________________
जंबुचरियम् एवं तुमं पि सामि य, चुक्कसि विउलाई सिद्धिसोक्खाई। पत्थेतो थेरी इव, इमाण उवलद्धभोयाण ॥२१॥
तओ इमं च निसामिऊण भणियं जंबुणामेण-'एत्थ निसुणसु ।' अवि य- मुद्धोऽहं जच्चतुरंगमो व्व न हु उप्पहेण तुब्भेहिं ।
सक्को इह नेऊणं, किमित्थ भणिएण बहुएण ॥२२॥ तीए भणियं-कह सो न सकिओ उप्पहं हरी नेउं ? । जंबुकुमारेण तओ, भणियं - सुण एक्कचित्तेण ॥२३॥ अत्थि मियंककरुज्जलथिरथोर[य]तुंगसालपरिक्खित्तं ।
सव्वगुणाण निवासं नामेण वसंतपुरनयरं ॥२४॥ जंमि य नयरे केसुं पुण कमुवलब्भइ ठाणेसु ?
चंदंमि मओ पउमेसु कंटया करिसणं च छेत्तेसु । वसणसमूहो जइ दोसिएसु जलहिम्मि कुग्गाहो ॥२५॥ तं भुंजइ वरनयरं, असेसपडिवक्खनिज्जियपयावो ।
सुकयजहट्ठियनामो, जियसत्तू नाम नरनाहो ॥२६॥ जो य सो केरिसो ? अवि य
चंदो व(ध)णओ इंदो सूरो तह जो जमो व्व परिकुविओ । सोमत्तदाणविक्कमपयावचंडत्तणेहिं च ॥२७॥ नरनाहस्स बहुमओ जिणयासो तत्थ सावगो अत्थि ।
जिणयंदभत्तिनिरओ, साहूणं पूयणरओ य ॥२८॥ जो य सो केरिसो?
सव्वन्नुवयणदीवयसमत्तसंसारदिट्ठपरमत्थो ।
उवलद्धपुन्नपावो मिच्छत्तपरम्मुहो निच्चं ॥२९॥ तस्स य राइणो असेसतुरयलक्खणपसत्थालंकियनियसरीरं सुप्पमाणं सुवनं च एक्कं महामहंतं तुरंगमरयणमत्थि । तस्स य पहावेण समब्भहियबलकोसविरियवंता वि नरवइओ तस्साणमुवगय त्ति । तओ अन्नया य राइणा चिंतियं-कस्स पुण एयं तुरंगमरयणं समप्पेमि जो सव्वायरेण इमं पयत्तेण पडिरक्खइ त्ति ? । इमं च
Jain Education International 2010_02
For Private & Personal Use Only
www.jainelibrary.org
