________________
१६५
तेरसमो उद्देसओ
गहिया य तीए गोणी, सा दुज्झइ पइदिणं पि थेरीए । गिण्हइ य मुंगचउले, धम्मेण य देइ अन्नेसिं ॥९॥ बीयाए थेरीए, विम्हयखित्ताय पुच्छिया अह सा । कह ते एसा जाया, संपइ सह संपया विउला ॥१०॥ अह तीए सा भणिया, पियसहि ! एएण किं विचारेण । तं मज्झ निव्विसेसा, मम गेहे चिट्ठसु सुहेण ॥११॥ जं किं पि मज्झ खाणं, पाणं वा अत्थि एत्थ गेहंमि । तं सहि ! तुज्झ समाणं, अच्छसु तं निव्वुया एत्थ ॥१२॥ तीए वि य सा भणिया, कह सहि ! चिट्ठामि तुज्झ गेहमि ।
जा मम सब्भाव पि व, न गच्छए नेहपरिहीणा ॥१३॥ भणियं च- "को जाणइ हिययगयं कइगयसब्भावनेहपरमत्थं ।
गरुओवयारसारा संववहारा हरंति मणं" ॥१४॥[ ] तीए वि चिंतियमिमं, कयाइ एसा एओसमावन्ना । मम देज्जऽब्भक्खाणं, जेण धणं होइ बहुविग्धं ॥१५॥ न य मच्छरेण गहियस्स पाणिणो किं पि अत्थिऽवत्तव्वं । साहिज्जंते य फुडे, न को वि दोसो इहं दिट्ठो ॥१६।। एवं [वि]चिंतिऊणं, सिटुं तीए जहट्ठियं सव्वं । तीए वि तओ जक्खो, विहिणा आराहिओ अह सो ॥१७॥ भणिया सा जक्खेणं, मग्ग वरं सो य तीए अह भणिओ । जं मम सहीए जायं, मम दुगुणं होउ तं सव्वं ॥१८॥ तीए वि य सा सहिया, काणा अह सा वि अंधला जाया ।
एवं तीए अप्पा, विणासिओ अत्थलुद्धाए ॥१९॥ भणियं चागमे-"दट्टणं च सहीए, हट्ठपहट्ठाए तीए सव्व( ? )संपत्ती ।
अइसिरिमिच्छंतीए, थेरीए विणासिओ अप्पा" ॥२०॥ [ ]
Jain Education International 2010_02
For Private & Personal Use Only
www.jainelibrary.org
