________________
१५३
एगारसमो उद्देसओ
लालाउलवयणाए, निच्चं पगलंतसव्वसोत्ताए । बीभच्छरूवउव्वेवणाए मायंगधूयाए ॥७७॥ अह भुंजइ सो भोए, एरिसरूवे अईव बीभच्छे । इत्थीण अहम्माए, कुच्छियरूवाए आसत्तो ॥७८।। जाओ य तीए गब्भो, पुन्ने संवच्छरंमि मेहरहो । परिसिद्धविज्जरयणो, पभणइ तं भाउयं ताहे ॥७९॥ वच्चामो नियनयरं, सिद्धाओ ताव अम्ह विज्जाओ । वेयड्ढनगवरंमी, कीलामो जेण कीलाहिं ॥८०॥ भुंजामो वरभोए, विज्जाहरबालियाहिं य समेया । पंचपयारे दिव्वे, विज्जाहरसिद्धसारिच्छे ॥८१॥ लज्जोणयवयणेणं, भणियं अह विज्जुमालिणा ताहे । भग्गपइन्नो अहयं, कह गच्छेमो अहं तत्थ ॥८२॥ नो सिद्धा मे विज्जा, एसा य वराइणी गरुयगब्भा । कह वच्चामि पमोत्तुं, एत्थाणाहं इमं वराई ॥८३॥ ता वच्च तुमं भाउय !, पुणरवि संवच्छरंमि संपुन्ने । आगंतुं मं नेज्जसु, कह मुंचेमो इमं बालिं ॥८४॥ मेहरहेणं भणिओ, वच्चसु एयाए किं अहम्माए । विज्जाहरदुहियाओ, गंतूणं तत्थ परिणेसु ॥८५॥ एवं बहुप्पयारं, भणिओ वि न जाव इच्छए गंतुं । मोत्तुं तं मेहरहो, पत्तो नियपट्टणं ताहे ॥८६॥ संवच्छरे य पुन्ने, मेहरहो विज्जुमालिणो पासं । गंतूणं तं पभणइ, वच्चेहि वच्छ ! वेयढें ॥८७॥ भणियं च तेण एसा, एक्कं ता बालवच्छया मुद्धा । बीयं च गब्भवंती, कह मुंचेमो इमं वराइं ॥८८॥
Jain Education International 2010_02
For Private & Personal Use Only
www.jainelibrary.org
