________________
एगारसमो उद्देसओ
१५१ पेच्छसि सुइवेहसमे, परछिड्डे न उण अप्पणो थोरे ।
अह वा सव्वो वि जणो, परिमुइओ होइ परवसणे ॥५७॥ भणियं च- "अणुसोयइ अन्नजणं, परभवसंकंतमूढबालजणो ।
न वि सोयइ अप्पाणं, किलिस्समाणं भवसमुद्दे" ॥५८॥ [ ] तओ एवं च भणियमेत्ता विलि(ल)या चिंतिउं पयत्ता-अहो ! पेच्छ एसो जंबुओ कह परिजंपइ माणुसवायाए । ता दिव्वो एस कोइ पओओ । तओ एयंमि अवसरे सो देवो दिप्पंतमउडमणिकिरणो । वरकुंडलरयणमयूहविमलकवोलसंकंतपडिप्पहसमुज्जोइयदिसिवरंतरालो जाओ महारूवेणं ति । कहिओ य सयलो निययवुत्तंतो । अणुसासिया य बहुसो तेण जिणप्पणीयधम्मं पइ । पडिवन्नो य भावओ तीए । उवणी[या] य तेण साहुणीणं सयासे । कहिओ य ताहिं धम्मो । तओ गहियसामन्ना परिसोहिऊण निंदणगरिहणखामणाहिं अप्पाणं कयउग्गतवच्चरणा कालमासे कालं काऊण सुरलोगं गय त्ति ॥
ता जह सो परिचुक्को, आमिस-मीणाण जंबुओ नाह ! ।
एवं तुमं पि चुक्कसि मोक्खस्स य तह य विलयाणं ॥५९॥ तओ इमं च निसामिऊण भणियं जंबुनामेण-'मुद्धे ! निसुणसु । अवि य-विज्जाहरो व्व नाहं, विसयाण कएण दोण्ह वि भवाणं ।
परिचुक्को अप्पाणं, नरयंमि खिवामि तुम्ह कए ॥६०॥ तीए भणियं-चुक्को, कह सो विज्जाहरो विसयगिद्धो ।
दोण्ह वि किल लोयाणं कहसु पसाएण मह सामि ! ॥६१।। तओ जंबुणामेण भणियं । अवि य- इंदो व्व करिसणाहो, निच्चं रंभाविदिन्नहरिसो य ।
गयणं पिव वित्थिन्नो, निच्चं पि विभंगकलिओ य ॥६२॥ मयणो व्व पत्तलद्धो, सिलीमुहो सरासणविलद्धच्छाओ य । उन्नयवंसो अइरावइ व्व तह दीहदंतो य ॥६३।। सरयब्भतुंगसिहरो, विज्जाहरलोयसेविओ रम्मो । वेयड्ढो अस्थि गिरी, पुव्वावरपत्तमयरहरो ॥६४।।
Jain Education International 2010_02
For Private & Personal Use Only
www.jainelibrary.org
