Page Text
________________
१४८
जंबुचरियम्
अन्नत्तो पवयणाइयारो । ता किं सेयं ? अहवा वरं मरणं मा पवयणाइयारो त्ति । जओ भणियं-‘जिणपवयणस्स अहियं सव्वपयत्तेण वारेई' । ता देमि से उदगं । भणिओ य सो- 'वच्छ ! जइ एवं तुमं मम साहंमिओ ता एयं पंचनमोक्कारं अणग्घेयरयणं घोसंतो चिट्ठ; जाव अहं उदगं समाणेमि' । पडिवन्नं च तेण । दिन्नो य से नमक्कारो । घोसिउं च पवत्तो । तओ थोववेलाए समागओ जिणयासो घेत्तूण उदयं । दिट्ठो य तेण । तओ हरिसिओ चित्तेण - अहो धम्मप्पहावो, अहो जिणसासणपवन्नाण करुणत्तणं, अहो साहम्मियवच्छलया, अहो वंचिया (यो) एत्तियं कालं इमस्स अणग्घेयधम्मरयणस्स । तओ एवं च नमोक्कारपरायणस्स गाढं रोमंचकंचुयसरीरस्स संजाया पमोक्कला ऊसासनीसासा । तओ धस त्ति सा सूलिया निग्गया तस्स सिरेण । तओ विसिट्ठवासणोवगयचित्तो नमोक्कारपभावेण य मरिऊण सोहम्मे कप्पे देवो ववन्नो । पउत्तो य ओही किंफला किल मम एसा देवरिद्धी संजाया । जाव दिट्टं नियसरीरयं सूलाए विभिन्नं, नाओ य पुव्वभवो । जाणियं च नमोक्कारफलमेयं ।
इओ य दिट्ठो जिणयासो चारगपुरिसेहिं तस्स उदगं पयच्छंतो । तओ गहिऊण य उवणीओ रायउले ताव जाव राइणा समाइट्ठा तस्स सूलिया । इमं च वइयरं दट्ठूण वेगेण समागओ सो देवो । तओ चउद्दिसं अट्टट्टहासपुव्वयं भणियं देवेण - 'अरे रे ! सुमरहट्ठदेव । समागओ अज्ज तुम्हाणं मच्चू' । इमं च भणमाणस्स समागया वडिया पत्थरसंघाया जणोवरिं । पवाइओ य झंझावाओ । ठड्याइं पओलिदुवाराई । विउव्विया य उवरिं ता[व] परिलंबमाणा सिला । इमं च सव्वं दट्ठूण भयविहलो सव्वो नायरजणो राया य निग्गओ अप्पं घेत्तूण । भणियं च राइणा - 'भो भो ! जो को वि अम्हाण एस परिकुविओ देवो वा दाणवो वा सो उवसमं गिण्हउ परिकहउ य जमम्हेहिं अवरुद्धं' । तओ भणियं देवेण - ' हा रे दुरायार ! पावकम्म, पुरिसाहम, निल्लज्ज, अणवेक्खियकारी ! अरे रे अनिरूविऊण जणं वावाएसि । ता एस ते मरणपज्जवसाणो दंडो न अन्नो 'त्ति । राइणा भणियं - 'भो महाणुभाव ! खमसु ममेगवराहं । न पुणो वि एवं समायरिस्सं' । देवेण भणियं - 'रे एक्कं ताव सो पंथिओ विलवंतो अदोसयारी वावाइओ तुमे । बीयं पुण इमो जिणयासो महाणुभावो, जो मणेण वि न समायरइ पावं, सो वि तुमे निक्कारणमेव विडंबिउं समादत्तो । संपयं मरणं ते जइ दंडो । उवभुंजसु दुक्कयफलं ' ति । राइणा भणियं - 'कयं मए
Jain Education International 2010_02
For Private & Personal Use Only
www.jainelibrary.org
| SR No. | 002554 |
| Book Title | Jambuchariyam |
| Original Sutra Author | N/A |
| Author | Jinvijay, Chandanbalashree |
| Publisher | Bhadrankar Prakashan |
| Publication Year | 2009 |
| Total Pages | 318 |
| Language | Sanskrit |
| Classification | Book_Devnagari & Literature |
| File Size | 12 MB |