________________
एगारसमो उद्देसओ
१४७ तओ उचियसमएण पहाया रयणी । भणियं च तीए महादेवीए-'भो भो ! पुरिसा एसो सो तक्करो चिट्ठइ पसुत्तो, जो तुम्हाण पणट्ठो । गहिओ य पहाविऊण तेहिं बद्धो य'। भणियं च- "सक्का सीहस्सवणे, पलाइउं हत्थिणो य मत्तस्स ।
सुकयस्स दुक्कयस्स व, भण कत्थ पलाइउं सक्का" ॥४४॥[ ] "जं जेण पावियव्वं, सुहं व दुक्खं व जीवलोयंमि ।
अप्पाणेण य वच्चइ, निज्जइ य बला कयंतेण" ॥४५॥ [ ] तओ भणिउं च पयत्तो सो-'किम[णव]गारिणं ममं बंधह ? एसा मम भज्जा अम्हे दो वि पंथियाणि ।' तीए भणियं-'हा हयास ! पत्तं ते असमिक्खियकारित्तणो संपयं फलं; तहावि एवं असंबद्धं पलवसि ?' तओ तेण चिंतियं-एयं पि भवइ एयाए सयासाओ। तओ- एक्कं गिण्हंति इमा, मुंचंतन्नं पुणो रमंतनं ।
अन्नं अन्नं च पुणो, मुच्चंति गिहं अभव्वाओ ॥४६॥ तओ एवं चिंतंतो पणामिओ राइणो सयासं सो । राइणा वि वज्झो समाणत्तो । सो भिन्नो सूलियाए । अवगोसणीए सा गया सूलिया । न मओ तक्खणं । गहिओ य दूसहतण्हाए । तओ भणिउं च पयत्तो सो-'भो भो लोया ! अणवराही अहमेत्थ गहिओ पुव्वभवकयमसुहकम्मुणा, न पुण चोरो अहं भवामि । ता अणाहं ममं पाएह पाणियं' ति। तओ एवं च कलणं विलवंतस्स गहिया अणुकंपाए बहवे नायरया । न य रन्नो भएण दाउं तरंति उदयं । एयंमि य अवसरे समागओ तेणंते जिणयासो नाम सावगो । तओ नायरएहिं चिंतियं जइ परं एसो इमस्स कज्जस्स समत्थो । तओ आसन्नमागओ [नायरएहिं य सो चोरो भणिओ ?] 'भो ! इमं जिणयासं नाम सावगं नयरपहाणं कारुणियं, ता इमं जायसु जइ परं इमो एयस्स कज्जस्स समत्थो । तओ आसन्नमागओ भणिओ तेण-'भो भो ! जिणयाससावग ! परमकारुणिओ तुमं । अज्जप्पभिइं च पडिवन्नो मए एस तुम्ह धम्मो। ता परितायसु ममं साहमियं जलपाणेणं' ति । तओ परिचिंतियं जिणयासेण-अहो एस एवंविहावत्थगओ साहमियत्तणमवलंबिऊण उदगं पत्थेइ, ता किमेत्थ करणीयं ? एगत्तो मम मरणं
Jain Education International 2010_02
For Private & Personal Use Only
www.jainelibrary.org
