Page Text
________________
१४०
जंबुचरियम् पडामि' । तीए भणियं-'सिलीमुहसमाणवरजुवाणाहिलसणिज्जा होह माणुसजम्मस्स य सारकामसुहपसाहणपरा य' । तओ विलासवईए भणियं-'उवविस किं निमित्तं ते समागमणं?' उवविट्ठा य सा । पारद्धा कामकहा । तीए भणिया य-'पुत्त ! किं इमेणं माणुसजंमेणं, जइ इमे माणुसजम्मसारभूया विसया अहिणव-अहिणवा अहिप्पेयजुवाणएहिं समं न सेविज्जंति?' । एवं च भणिऊण बहुहा, साहियं तीए परिव्वाइयाए । जं किंचि तेण जुवाणेण संकेयट्ठाणनिमित्तं संदिलृ ति । तओ चिंतियं च तीए-न सोहणं हवइ छक्कं न गुज्झं । ता पओयंतरेण तस्स संकेयं देमि । इमं च परिचिंतेमाणीए पहया सा रूसिऊण पट्ठीए मसिविलित्तकरयलेण । अक्कोसमाणीए य घेत्तूण सिरोरुहेसु निक्कासिया पच्छिमदुवारेणं ति । गया य परिमिलाणवयणा तस्स जुवाणस्स सयासं । साहियं च तहा-'जहा नेच्छइ सा तुमं । इमं इमं च तीए मम समायरियं' । तओ कामसत्थ नीईकुसलेण गहिओ तेण भावत्थो । जहा-जो एस कसिणकरतलप्पहारो सो अंधारपक्खो । पंचंगुलीहिं पुण करतलपहरखुत्तकसिणाहिं कण्हपंचमीए संकेओ । तत्थ य पच्छिमदुवारेण इमीए निक्कासणसूइएण गंतव्वं । अहो पेच्छ तीए चउरत्तणं ! जं इमा वि वंचिया । संकेयं च दिन्नं । इमं च परिचिंतेमाणेण भणिया सा तेण-'भयवइ ! खमसु जं तुमं परिकिलेसिया मम निमित्तं तीए पावाए । जा य एवं धिट्ठा सा न तीए मम किं पि पओयणमत्थि, ता उवविससु तुमं' ति । गया य सा निययट्ठाणं । सो य समागयाए कसिणपंचमीए पविट्ठो पच्छिमदुवारेण तीए गेहं । दिट्ठा य असोगवणियाए तेण सा विलासवई । गिहावहडेप्पडिओ य सह तीए पारद्धं च तं किं पि जुवाणजणपरिमोहणियं साहुजणविणिदियं पओयणं ति । एवं च अच्छिऊण कामकीलाविणोएण कं पि वेलं तत्थेव निंदावसेण पसुत्ताई ति । पच्छिमजामिणीए य सरीरचिंताविणिग्गएण दिट्ठा ससुरेण पसुत्ता । चिंतियं च णेण-अहो ! दुट्ठसीला इमा वहू, पेच्छ कह परपुरिसेण समं पसुत्ता एसा । इमा य पहाए मिच्छं पडिवज्जिही । ता पुत्तपच्चयत्थं गिण्हामि चलणाओ से नेउरंति चिंतिऊण गहियं । नायं च तीए गहिज्जमाणं । भणिओ य सो तीए जुवाणो नास लहुँ, नाओ तुमं । आवयाकाले य मम साहेज्जं कुणसु' त्ति । गओ य सो । साय गंतूण गेहं पसुत्ता सह भत्तुणा । अच्छिऊण थेववेलं भणिओ सो तीए'अज्जउत्त ! अइमहंतो एत्थ उण्हो उव्वेयाउलीहूयं मम सरीरयं । ता सिग्धं पयट्टसु
Jain Education International 2010_02
For Private & Personal Use Only
www.jainelibrary.org
| SR No. | 002554 |
| Book Title | Jambuchariyam |
| Original Sutra Author | N/A |
| Author | Jinvijay, Chandanbalashree |
| Publisher | Bhadrankar Prakashan |
| Publication Year | 2009 |
| Total Pages | 318 |
| Language | Sanskrit |
| Classification | Book_Devnagari & Literature |
| File Size | 12 MB |