________________
॥ एगारसमो उद्देसो ॥
एत्थंतरे य भणियं सहरिसकलललियमम्मणगिराए । पउमसिरी भज्जाए लज्जोणयवयणकमलाए ॥१॥ पियसहिओ ! एसऽम्हं होज्ज पिओ नूण कोल्हुयसमाणो ।
जह सो पच्छायावं पत्तो तह पाविही एस ॥२॥ तओ इमं च निसामिऊण वियसंतवयणकमलेण भणियं जंबुणामेण-'को सो मुद्धे ! कोल्हुओ? कहं वा पच्छायावं पत्तो ?' त्ति । तओ तीए भणियंअवि य- अत्थि धणधन्नगोउलगामागरनगरपट्टणसमिद्धो ।
विमलजलभरियसरवरनिव्वाणुज्जाणवणकलिओ ॥३॥ पिक्कफलसालिमंडवपसरियसुसुयंधपरिमलायड्ढो । कासवजणमणपूरियहेलाए गुरुयसंतोसो ॥४॥ ढेक्कंतथोरपंडरवसहविसाणग्गभिन्नभिउडियडो। निज्जियवम्महसरनियरपसरसज्झाणसाहुगणो ॥५॥ जिणभवणधवलधयवडनहयलअंदोलमाणवरपवणो ।
अंगा नाम समिद्धो इह भरहे जणवओ रम्मो ॥६॥ जंमि य जणवए कं कं व दीसइ ? अवि य- धम्मपसाहणजुत्ता पवरजुवाणा य तह मुर्णिदा य ।
सहलाई तरुवर(?)सिहराई जत्थ य सीमंतराइं च ॥७॥ दियवरनिसेवियाओ सालाओ जत्थ तह य वावीओ । भमुयाओ सालीओ जत्थ य कोडुंबिणीओ य ॥८॥
Jain Education International 2010_02
For Private & Personal Use Only
www.jainelibrary.org
