________________
१३६
जंबुचरियम् दुक्कयकम्मं जाणसु जं तं इंगालडहणवाणिज्जं । भोगसुहासानडिओ न गणइ पुरिसो व्व सो डाहं ॥४७॥ वानरजूहं चोरा तं पि जलं होइ तस्सरिच्छं तु । अवहरिय दविणसारो वच्चइ मुच्छावसं जुत्तं ॥४८॥ वाओलीसंतत्तो मुच्छावसमुवगओ जहा पुरिसो । तह दालिद्ददुहत्तो मुज्झइ पुरिसो व्व सव्वजणो ॥४९॥ सव्वसरिसायराण य कूवतलायाण जह जलं पीयं । तह पत्तं जीवेणं देवेसु इमेसु भोगसुहं ॥५०॥ किंनर-किंपुरिस-महोरगेसु गंधव्व-जक्ख-भूएसु । रक्ख-पिसाएसु तहा तह वि न तित्तिं इमो पत्तो ॥५१॥ नागासुरविज्जुसुवन्नग्गिथणिउयहिदिसाकुमारेसु । वाउकुमारेसु तहा दीवकुमारेसु तह पत्तं ॥५२॥ कप्पेसु बारसेसु वि तहा य गेवेज्जवरविमाणेस् । पंचोत्तरेसु वि तहा पत्ताई इमेण सोक्खाई ॥५३॥ सरिसायरोवमेसु य सुरवरभोएसु जो इमो अम्ह । जीवो कह वि न तित्तो गच्छउ कह जललवसमेहि ॥५४॥ इंगालडाहगो वि य नाहं तणकोडिबिंदुसरिसाणं । भोयाण कारणेणं मुद्धे ! निवडामि संसारे ॥५५॥ गरुयगुणगणाणं पालणे निच्चजुत्ता, परभवजणिएणं कंमुणा के वि नूणं । ववगयगुरुकम्मा ते न मोत्तूण मोहं, जिणवरवरमग्गं हुंति लीणा विसालं" ॥५६॥ इय जंबुणामचरिए दत्तसिरीदत्तउत्तरभिहाणो। उद्देसो परिकहिओ एत्तो य परं पवक्खामि ॥छ॥ ॥५७॥
Jain Education International 2010_02
For Private & Personal Use Only
www.jainelibrary.org
