________________
॥ नवमो उद्देसओ ॥
एत्थंतरे य भणियं निब्भरअणुरायसहरिसमणाए । लज्जोणयवयणाए सिंधुमईनामभज्जा ॥१॥
पियसहिओ ! एस म्हं होज्ज पिओ नूण करिसगसमाणो । जह सो पच्छायावं पत्तो तह पाविही एस ॥२॥
निसामिऊण वियसंतवयणपंकएण भणियं जंबुणामेण - 'को सो मुद्धो करिसगो, कहं वा पच्छायावं संपत्तो' त्ति ? । तओ तीए भणियं
अवि य- धणधंनगुणसमिद्धो कोडुंबियपवरसेविओ निच्चं । अत्थि इह महविसए नंदणयं नाम वरगामी ||३||
तत्थ य एक्को दालिद्ददुक्खाभिभूओ निवसइ कोडुंबिओ । तस्स य अत्थि सयलकुडुंबभारपरिसहणक्खमा सययं चिय छंदाणुयत्तणपरा य समसुहदुक्खविहवा एक्का भारिति । एवं च तेसिं गरुयनेहाणुरायबद्धहिययाणं करिसगवित्तीए गच्छइ कालो । अन्नयाय सा तस्स भज्जा पसूया दारयं । तओ तस्स जंमेण हरिसतोस - निब्भराई जायाइं दो वि ताई । निबद्धा य आसा - किर एस अम्हाणं वुड्ढभावगयाणं अंधलट्ठियावलंबणभूओ होही, कुलसंतइकरो य ।
जह य पईवो पयडइ सयलं वि घरोयरं सुपज्जलिओ । तह किर कुलमुज्जोयइ सुयजम्मो एत्थ लोगंमि ॥४॥
तओ एवं च बद्धासेहिं सव्वहा सव्वपयत्तेण विद्धि नीओ सो तेहिं । संपत्तो य जोव्वणं । अन्नया य खणभंगुरत्तणेण दुट्ठसंसारविलसियस्स, मरणपज्जवसाणयाए जीवलोगस्स, तडिविलसियसमचवलत्तणेण आउयस्स, उवरया सा तस्स कोडुंबियस्स भज्जा । गहिया य ते पियापुत्ता महासोएण । कयं च तीए सव्वं मयकंमं । अन्नया य
Jain Education International 2010_02
For Private & Personal Use Only
www.jainelibrary.org
