________________
अट्ठमो उद्देसओ
१२१ जलणे जले समुद्दे पायाले वावि जइ वि पविसामि । तह वि मम नत्थि सुद्धी निग्घिणकंमस्स पावस्स ॥७५॥ पावाण य पावयरो सव्वाहमाण तह य निद्धंमो । दुट्ठाणमहं दुट्ठो निल्लज्जाणं पि निल्लज्जो ॥७६॥ ता किं मम इह सेयं निग्घिणकंमस्स पावगारिस्स ।
अहवा जइ परमरणं एवं मम विनडियस्स भवे ॥७७।। तओ इमं च भणमाणो जाव मरणत्थं पहाविऊण घरवावीए अत्ताणं पक्खिविहि ताव घरिओ अज्जाहिं । भणिओ य-'धम्मसील ! किमेयं तए बीयमकज्जं समाढत्तं ? ।' अवि य- एक्कं तावेयं चिय बीयं कह कुणसि सोम ! अप्पवहं ।
किं बुड्डो बुड्डो च्चिय ताव तलं पेच्छसे मुद्ध ॥७८॥ एक्कं घोरं पावं तं चेव इमं तहा कुणसि मुद्ध । जायंमि पलीवणए तणपूलं खिवसि तं मुद्ध ॥७९॥ एक्कं कयं अकज्जं बीयं पुण निंदियं इमं कुणसि ।
मालस्स निवडियस्स य एसो उप्पिट्टणपहारो ॥८०॥ अन्नं च-ण कयाइ पावपुंजो पावेण कएण सुज्झए सोम ! ।
रुहिरविलित्तं वत्थं किं सुज्झइ सोणिएणेव ॥८१॥ सुणएण भक्खियस्स य जरखेडीपिट्टणं कयं तुमए ।
जइ डसिओ सप्पेणं किं दिज्जइ तस्स विसपाणं ॥८२॥ अन्नं च जं तए भणियं जलाइसु निवडियस्स य नत्थि मम सुद्धी ता किं तत्थ पावसुद्धी दिट्ठा ? अवि य- जल-जलणे य समुद्दे निवडियमेत्तस्स नासए जीयं ।
पावं पुणो तह च्चिय जीवेण समं परिव्वयइ ॥८३॥ सुज्झइ जह पुण एयं पावकलंकं तहा सुणसु सोम ! । तवसंजमनीरेणं भावण्हाणेण हायस्स ॥८४॥ ता चइऊणं सव्वं गुरुपामूलंमि कुणसु वयगहणं । कुणसु य तह सज्झायं जइ सुद्धि इच्छसे सोम ! |८५॥
Jain Education International 2010_02
For Private & Personal Use Only
www.jainelibrary.org
