________________
११३
अट्ठमो उद्देसओ
सीसाओ गलियाणं कह वि हु वयणंमि ते उ संपत्ता । आसाइऊण इच्छइ पुणो वि अन्ने वि निवडते ॥१५॥ अगणेउमुरगऽयगरऽयडकरिंदुरमहुयरीण य भयाइं । महुबिंदुसंदसायणगिद्धो व सो हरिसिओ जाओ ॥१६॥ एयंमि अवसरंमी कुंडलघोलंतकन्नजुयलेण । गयणयलसंठिएणं दिट्ठो विज्जाहरभडेण ॥१७॥ करुणोववन्नएणं भणिओ सो तेण देसु करमेक्कं । अयडाओ भीमाओ उद्धरिमो जेण तं खिप्पं ॥१८॥ भणिओ सो पुरिसेणं मा कड्डसु देव ! कह व मे पत्ता । असणाइएण दुलहा महुबिंदू दिव्वजोएण ॥१९॥ मूढो एस वराओ ममंमि संते इमस्स वसणस्स । उत्तरिऊणं नेच्छइ चिंतेउं सो गओ ताहे ॥२०॥ भणि(वि)याण मोहविहडणनिमित्तमेत्तं पयंसियं एयं । परिगप्पियमक्खाणं, उवसंहारं इमस्सेयं ॥२१॥ "जो पुरिसो सो जीवो अडवी उण चउगई उ संसारे । सो गयवरो य मच्चू निसायरिं तं जरं जाण ॥२२॥ वडपायवो य मोक्खो वणगयमच्चुभयवज्जिओ दूरं । विसयाउरेहि नवरं आरुहिउं सो न सक्को त्ति ॥२३॥ मणुयभवो उण अयडो भुयंगमा जाण हुंति उ कसाया । दट्ठो जो तेहिं नरो कज्जाकज्जं न सो मुणइ ॥२४॥ सरथंभो आउक्खं तमुंदरा किण्ह-सुक्किला पक्खा । उम्मूलयंति दोन्नि वि अहोनिसं पहरदाढाहिं ॥२५॥ महुयरिगणो य जो सो विविहा ते वाहिणो मुणेयव्वा । संतत्तो तेहिं नरो उव्विग्गो भमइ निच्चं पि ॥२६।।
Jain Education International 2010_02
For Private & Personal Use Only
www.jainelibrary.org
