________________
११२
जंबुचरियम् जइ कह वि आरुहेज्जा रविसंदणतुरयभग्गवेयरसं । वडपायवं महंतं छुट्टेज्ज तओ गइंदस्स ॥३॥ परिचिंतिऊण एवं भीओ कुससूइभिन्नपायालो । वेएणं संपत्तो तुंगं वडपायवं अह सो ॥४॥ दट्ठण तं विसन्नो दुल्लंघं गयणगोयराणं वि । उत्तुंगखंधवित्थिन्नपरिरयं गुहिरनग्गोहं ॥५॥ आरुहिऊण(हिउं) असमत्थो अच्छइ जा दुट्ठगयवरो ताव । संपत्तो वेएणं आसन्नं तस्स पुरिसस्स ॥६॥ भयवेविरंगमंगो समंतओ खित्तनयणतरलच्छो । सहस त्ति नवर दट्ठण भीममयडं तणच्छइयं ॥७॥ अप्पा तेण निहित्तो निरावलंबं धस त्ति धरणीए । वित्थिन्नभित्तिरूढो सरथंभो तत्थ य विलग्गो ॥८॥ पडणाभिघायकुविए पेच्छइ य भुयंगमे य सो भीमे । चत्तारि डसिउकामे विसलवपज्जलियनयणजुए ॥९॥ अन्नं पि डसिउकामं दीहरदाढाललंतदोजीहं । रत्तच्छकसिणदेहं पेच्छइ सहस त्ति सोऽयगरं ॥१०॥ पेच्छइ य तिक्खदाढे पंडर-कसिणा य मूसगे दुनि । घोरे महारउद्दे उम्मूलंते य सरथंभं ॥११॥ अह तेण गइंदेणं कुविएण नरं अपावमाणेण । वेज्झाई वि दिन्नाइं नग्गोहदुमस्स अच्चत्थं ॥१२॥ संचालियस्स सहसा खुडिऊणं वियडसाहसं भूयं । पडियं धस त्ति उवरिं महुजालं तस्स कूवस्स ॥१३॥ अह कुवियमहुयरीण य समंतओ डसियमाणदेहस्स । सीसंमि कह वि पडिया महुबिंदू तस्स पुरिसस्स ॥१४॥
Jain Education International 2010_02
For Private & Personal Use Only
www.jainelibrary.org
