________________
॥ अट्ठमो उद्देसओ ॥
तओ इमं च निसामिऊण भणियं जंबुणामेण-'सोमं ! निसुणसु, जं तए भणियं जहा माणसु ताव विसयसोक्खं तस्स परमत्थं ति । कुओ एत्थ संसारसमावन्नाणं जाइजरामरणरोगसोगपर(रि)पीडियाणं रागदोसगहियाणं विसयपिसाअवहियचेयणाणं च सत्ताणं सुहं ति । न किं पि सुहं, बहुं च दुक्खं ति । एत्थ य सुण एक्कं नायंमि (ति?)' ।
[जंबुणा कहियो महुबिंदुदितो ।] जह को वि एत्थ पुरिसो अच्चंतं संपयाए परिहीणो । दालिद्ददुक्खतविओ विणिग्गओ निययदेसाओ ॥१॥ परदेसं गंतुमणो गामागरनगरपट्टणसणाहं ।
लंघेऊण सएसं कहिंचि पंथाओ पब्भट्ठो ॥२॥ तओ इओ तओ भमंतो य पत्तो सो सालसरलतमालतालालिबउलतिलयनिचुल्लंकोल्लकलंववंजुलपलाससल्लइतिणसनिबकुडयनग्गोहखइरसज्जुज्जणंबजंबुयनियरगुविलं दरियमहिसजूहबहिरियमुक्कनायदिसं महाडविं । तीय तण्हाछुहाभिभूएणं दरियवणदुट्ठसावयरवायन्नणओ तत्थ लोललोयणेणं, दीहपहपरिसममुप्पन्नसेयजलधोयगत्तेण, मूढदिसायक्कविसमपहखलंतपायसंचारं परिभमंतेण, दिट्ठो य पलयघणवंद्रसंनिभो तट्ठवियाणेयपहियजणवड्डिउच्छाहो, गद्दभगज्जियरवायू(वू?)रियवियडरन्नुद्देसो सियवसणपरिहाणनिसियकरवालवावडग्गहत्थविगरालरूवदुट्ठरक्खसपायालो मग्गओ तुरियतुरियमवधावंतो दुट्ठवणहत्थि त्ति । तओ य तं दट्टण मच्चुभयवेविरंगो अवलोइयसयलदिसामंडलो पुव्वदिसाए उदयगिरिसिहरसन्निभं निरुद्धसिद्धगंधव्वमिहुणगयणपयारमग्गं महंतं नग्गोहपायवं । अवलोइऊण परिचिंतिउं पयत्तो । कह ? -
Jain Education International 2010_02
For Private & Personal Use Only
www.jainelibrary.org
