Page Text
________________
सत्तमो उद्देसओ
१०३ ता वच्छ ! एयवुत्तंतं तेसिं जणणिजणयाणं विभइयं कहामो; जहा विवाहमंगलाणंतरमेव कुमारो दिक्खं पडिवज्जिही । ता एवं च ठिए पओयणे जहा तुम्हाणं रोयइ तहा अणुचिट्ठह' त्ति । निवेइयं च जहावट्ठियं तेसिं । कुमारो वि ठिओ मज्जणकीलाए । तओ सयसहस्सपाएहिं बहुगुणसारेहिं सिणेहपरमेहिं सुमित्तेहिं व अब्भंगिओ तेलेहि विलासिणीयणेण । उव्वट्टिओ य खरफरुससहावेहिं सिणेहाववहरणपडुएहिं खलेहिं व कसायजोएहिं । हाणिओ पयईसत्थसीयलसुहसेवसच्छेहिं कलंकावहारेहिं सज्जणहियएहिं व जलुप्पीलेहिं । एवं च पहायसुइभूओ दिव्वालंकारभूसियसरीरो देवंगवत्थजुयलनियंसणो य पविट्ठो नेमिजिणयंदभवणवरं । तत्थ य परियणोवणीयदिव्वसुरहिपरिमलायड्डियगुमगुमिन्तभमरउलामोडियचरणचुम्बिएहिं गंधमल्लाइएहिं निव्वत्तिया भगवओ नेमिजिणिदस्स महापूया। उप्पाडिओ य कप्पूरहरियंदणमयणकत्थूरियायट्ठो सयलगयणयलमभिवासयंतो धूओ । तओ पणिवइओ भगवओ संखचक्कंकुसंकिए विमले पायकमलजुयले । उवविट्ठो य भगवओ पुरओ सुद्धवसुहावीढे । भगवओ विणिवेसियनयणमाणसो य एवं च थोउं समाढत्तो।। अवि य- जय ! सयलभुवणभूसण ! जय विणिहयपंचबाणसरपसर ! ।
जय ! सिहिकंठसमज्जुइ जय नेमि सुरिंदपणिवइय ! ॥१॥ जय विमलनाणपयडियसमत्थतइलोयभावसब्भाव ! ।
जय बालभावभावियपरमत्थपयत्थसमयत्थ ! ॥२॥ तओ, एवं च सहरिसं थोऊण जिणवरिंदं पुणो पुणो नमिऊण पायकमलजुयलं गओ भोयणमंडवं । तत्थ निव्वत्तियसुहभोयणो पवड्डमाणसुहज्झवसाओ सह वयंसएहिं अच्छिउं पयत्तो । इओ य निवेसि(इ)ए तेसिं जणणि-जणएण सब्भावे ते सह भारियाहिं मंतिउं पयत्ता । जहा पेच्छ पेच्छ, केरिसं संजायं । अन्नहा परिचिंतियमिमं, अन्नहा संजायं ति । भणियं च- "अन्नह परिचिंतिज्जइ सहरिसकंदुज्जएण हियएण ।
परिणमइ अन्नह च्चिय कज्जारंभो विहिवसेण" ॥३॥[ ] तो एवं ठिए किं पुण कायव्वं अम्हेहिं । अहवा अत्थि अन्ने वि सोहणा वरा ता तेसिं दिज्जंतु एयाओ त्ति । इमं च वयणपरंपराए निसामियं वुत्तंतं ताहिं दारियाहिं । तओ ताओ केरिसाओ जायाओ।
_Jain Education International 2010_02
For Private & Personal Use Only
www.jainelibrary.org
| SR No. | 002554 |
| Book Title | Jambuchariyam |
| Original Sutra Author | N/A |
| Author | Jinvijay, Chandanbalashree |
| Publisher | Bhadrankar Prakashan |
| Publication Year | 2009 |
| Total Pages | 318 |
| Language | Sanskrit |
| Classification | Book_Devnagari & Literature |
| File Size | 12 MB |