________________
॥ सत्तमो उद्देसओ ॥
तओ एवं च अणेगहा भणिए जंबुकुमारेण, नाऊण तस्स निच्छयं अणवरयपयट्टबाहसलिलपक्खालियनिययनिम्मलकवोलयलाए, पक्खलियसगग्गयक्खरगिराए, दीहुण्हाणवरयनीसासझलुसियपवरदेहलट्ठीए, कह कह वि परिमंथरं भणियं जणणीए'वुत्त ! जइ एवं अवस्सं तए निच्छओ कओ, ता पूरेसु मम पुव्वविचिंतिए ताव मणोरहे; सव्वहा वि निव्वत्तेसु इमं मे [मह]त्थं अब्भत्थणं' ति । तओ जंबणामेण भणियं-'अंब ! किं तं महत्थमब्भत्थणं जमम्हेहिं वि किलण कीरइ ?' त्ति । तीए भणियं-'वच्छ ! तुमं तावम्हाणं पढम चिय मणोरहसएहिं जाओ, वद्धिओ य सययं वद्धतमणोरहाणं चेव । संपयं पि जइ अहिणवुव्वाहियवहुयणा अवणयमुहकमललोललोयणा धंना अणवरयनिरिक्खिज्जमाणवरमुहं वच्छ ! पेच्छामि तुमं । तओ अहं पि एवं कए तुमए सह पव्वइस्सं ति । इमंमि य भणिए, भणियं जंबुणामेण-'अंब ! जइ ते एवं निब्बंधो तो पूरेह मम (?) वरमुहालोयणेण य नियमणोरहे । किं पुण तए मममन्नं पि विग्घंतरं विहेयव्वं । अहं च वित्ते विवाहकल्लाणे तयणंतरमेव अप्पहियं समायरिस्सं'ति । तओ हरिसनिब्भररोमंचकंचुयतणुलट्ठीए भणियं धारिणीए-'पुत्त ! एयं ति । अन्नं च-अत्थेत्थ तुह पुव्ववरियाओ अट्ठ कन्नगाओ जिणसासणरंजियमईण महाइब्भाणं धूयाओ । तो परिणेसु तुमं ताओ त्ति । ते य इब्भा तंजहा-समुद्दपिओ समुद्ददत्तो सायरदत्तो कुबेरदत्तो कुबेरसेणो वेसमणदत्तो वसुसेणो वसुपालगो त्ति । ताणं च इमाओ भारियाओ, तं जहा-पउमावई कणगमाला विणयसिरी धणसिरी कणगवई सिरिमई जयसेणा विजयसेण त्ति । ताओ य कंनगाओ एएसिं धूयाओ, तंजहा-सिंधुमई दत्तसिरी पउमसिरी पउमसेणा, एयाओ चत्तारि देवलोगचूयाओ देवभवे वि भारियाओ आसि । सेसा उण नागसेणा कणयसिरी कमलावई विजयसिरी नामाओ त्ति । एयाओ रूव-जोव्वणविलासविन्नाणकलागुणसोहग्गकलियाओ ।
Jain Education International 2010_02
For Private & Personal Use Only
www.jainelibrary.org
