________________
जंबुचरियम् कहिओ दिटुंतो भे एयस्स य उवणओ निसामेह । जह गणिया तह जाणसु धम्मसुई जिणसमुद्दिट्ठा ॥१२५।। जह इब्भरायपुत्ता तह जीवा विमलनाणपरिहीणा । इच्छंति ते सुहाइं सुरमणुयभवेसु विउलाई ॥१२६।। जह आहरणा तह देससव्वविरईतवोविहाणाई । जह होइ इब्भपुत्तो भविओ तह मोक्खसुहकंखी ॥१२७॥ जह रयणपरिक्खाकुसलं तं होइ तह संमवरनाणं । कंचणपीढं च जहा होइ तहा दंसणं एत्थ ॥१२८॥ अच्चंतमहग्घाई हुंति जहा एत्थ पंच रयणाई । महसद्दसंजुयाई पंच वयाइं तहा हुंति ॥१२९॥ जह रयणाण विणोए सुहसंपत्तीउ इब्भपुत्तस्स । भव्वाण तहा मोक्खो होइ गयाणं सुहुप्पत्ती ॥१३०॥ ता जह इब्भसुएणं रयणगुणविणिच्छिओ कओ तत्थ । थेवेण वि कालेणं न तहा इयरेहिं बहुणावि ॥१३१॥ एवं च तत्तगहणे न कारणं चे(थे)वकाल-बहुकालो ।
ता एयं नाऊणं ममं विसज्जेह तायम्ब ! ॥छ। ॥१३२।। तओ तेहिं भणियं -
एही पुणो वि भयवं विहरंतो एत्थ गणहरो जइ य ।
तइया करेसु पुत्तय ! वयगहणं तं अविग्घेणं ॥१३३।। तेण भणियं-एत्थ य सुणेह एक्कं साहिप्पंतं तुमे उ आहरणं ।
तेहिं वि भणियं साहसु अह कहिउं सो समाढत्तो ॥१३४॥ उत्तुंगधवलपायारवेढियं अत्थि कंचणसमिद्धं । कंचणपुरं पसिद्धं सरिसं जं देवलोएण ॥१३५॥ तत्थ य पंच वयंसा वसंति ते अन्नया समोसरियं । आसन्ने कुंथुजिणं तत्थेव गया सुणेऊण ॥१३६॥
Jain Education International 2010_02
For Private & Personal Use Only
www.jainelibrary.org
