________________
छट्ठो उद्देसओ
भणइ [य] ते जइ तुब्भे काउं मं निग्गुणं परिच्चयह । ता मम सुमरणहेउं घेप्पउ मह संतियं किं पि ॥११३।। उवरोहेण य ते वि हु गिण्हंति य कडयकुंडलाईयं । आहरणं अह अन्नो समागओ तत्थ इब्भसुओ ॥११४॥ सो रयणविहीकुसलो दिटुं अह तेण तत्थ कणयमयं । पंचमहारयणजुयं एक्कं वरपायपीढं ति ॥११५॥ तं पुण अणायरेणं दीसंतं तत्थ ताहिं गणियाहिं । खिप्पइ इओ तह च्चिय अनायरमत्थसाराहिं ॥११६॥ अह कं पि सो वि कालं तीए सह अच्छिऊण य पयट्रो । देसाहिमुहं तीए सो भणिओ सुहय ! निसुणेसु ॥११७॥ जइ तं चलिओ अवस्सं ता गिण्हसु मज्झ संतियं किंचि । सुमरणहेउ महग्धं आहरणं किं पि जं दिव्वं ॥११८॥ तेण य भणियं धवलच्छि ! निच्छओ तुज्झ एत्थ अइगरुओ । ता एयं पावीढं तुह पयपरिफंसियं गहियं ।।११९॥ तीए भणियं अन्नं गिण्हाहि महग्घमुल्लयं किंचि । किं ते इमेण होही गहिएणं अप्पमुल्लेणं ॥१२०॥ एएण वि पज्जत्तं वरतणु तुह पायर्फसललिएण । अन्नेण मह न कज्जं इह भणियं इब्भपुत्तेण ॥१२१॥ दिन्नं अह तं तीए तेण [य] परिचिंतियं अहो मुद्धा । ते रायसुया सव्वे जाणंति न रयणपरमत्थं ॥१२२।। एयं महग्घमुल्लं परिहरिउं जे य लिंति निसा(स्सा)रे । अन्नाणमोहियमणा आहरणे कुंडलाईए ॥१२३॥ अह सो तं घेत्तूणं पत्तो निययंमि चेव देसंमि । विणिवट्टिऊण रयणे सुहभाई तत्थ संवुत्तो ॥१२४॥
Jain Education International 2010_02
For Private & Personal Use Only
www.jainelibrary.org
