________________
८३
छट्ठो उद्देसओ
अइअसुहभावजणिया अयराणं तीसकोडकोडीओ। तिव्वठिई पढमाणं तिण्हं तह अंतिमस्सावि ॥३३॥ सयरिं च मोहणीयस्स नामगोत्ताण होति तह वीसं । तेत्तीसं अयराइं परमठिई आउयस्सावि ॥३४॥ एयं अट्ठपयारं कंमं अह बंधई उ एएहिं । जीवो उ कारणेहिं पवंनियं पुव्वसाहूहिं ॥३५॥ पडणीयमंतराइय उवघाए तप्पओस निण्हवणे । आवरणदुगं भूयो बंधइ अच्चासणाए य ॥३६॥ भूयाणुकंप वय-जोगउज्जओ खंतिदाणगरुभत्तो । बंधइ भूओ सायं विवरीए बंधई इयरं ॥३७॥ अरहंत-सिद्ध-चेइय-तव-सुय-गुरु-साहु-संघपडणीओ। बंधइ दंसणमोहं अणंतसंसारिओ जेण ॥३८॥ तिव्वकसाय( या) बहुमोहपरिणओ राग-दोससंजुत्तो । बंधइ चरित्तमोहं दुविहं पि चरित्तगुणघाई ॥३९॥ मिच्छद्दिट्ठि महारंभपरिग्गह-तिव्वलोहनिस्सीलो । निरयाउयं निबंधइ पावमई रोद्दपरिणामो ॥४०॥ उमग्गदेसओ मग्गनासओ गूढहिययमाइलो । सढसीलो य ससल्लो तिरियाउं बंधए जीवो ॥४१॥ पगईय तण( णु)कसाओ दाणरओ सीलसंजमविहूणो । मज्झिमगुणेहिं जुत्तो मणुयाउं बंधए जीवो ॥४२॥ अणुव्व(व)य-महव्वएहिं बालतवाकामनिज्जराए य । देवाउयं निबंधइ संमद्दिट्ठी य जो जीवो ॥४३॥ मण-वयण-कायवंको माइल्लो गारवेहिं पडिबद्धो । असुहं बंधइ नामं तप्पडिवक्खेहिं सुहनामं ॥४४॥
Jain Education International 2010_02
For Private & Personal Use Only
www.jainelibrary.org
