________________
छट्ठो उद्देसओ
तओ एवं च विसिटुं पुन्नफलमणुभवंतो पुव्वभवसुकयवासणागुणेण बालभावे वि अबालभावचरिओ सयलसत्थकलासंपत्तिसुंदरं कुमारभावं अणुभवंतो, पुव्वभवब्भासेण य अणुरत्तो सत्थेसु, बहुमन्नइ य गुणसमिद्धे, पुलइज्जए सुहासिएसु, न बहुमन्नइ विसयासत्ते, भावेइ संसारसहावं, वड्डए सद्धाए निययसहावेण य, करुणापहाणहियओ पियजंपिरो य, ईसिविहसियपुव्वप्पहासणसीलो, सुसाहुजणसेवानिरओ, महापयाणपूरियपणइयणहिययपरितोसो य । तओ सो मित्तबंधुपरिगओ नाणाविहकीलाहिं अभिरममाणो अच्छइ । एवं कयाइ, वीणावेणुमणहरगीयायन्नणेण, कयाइ नाणाविहदुमलयाकिण्णपवरउववणविहारेण, कयाइ तित्थयर-सिद्ध-साहु-चक्कवट्टिबलदेव-वासुदेव-चरियायन्नणेण, कयाइ भवणवाविमज्जणकीलाविणोएण, कयाइ सुसाहुपूयोवयारकरणेणं । किं बहुणा मगहपुरसयलकामिणीयणकुवलयदलसामलाहिं नयणमालंजलीहिं अणुपिज्जमाणो, अवहरंतो य मणहररामायणमणाई, वियरंतो य रायगिहपुरवरे गमेइ कालं ति । वरियाओ य जणणिजणएहि तस्स अट्ठ इब्भ-- दुहियाओ। तओ एयंसि अवसरे किं जायं ? अवि य
कोहग्गिसमणमेहो माणवराचलपमेयअसणी य । मायामोत्थवराहो लोहग्गहसिद्धवरमंतो ॥१६॥ निज्जियसयलसुरासुरमयरद्धयमाणमूरणपयंडो । भव्वकुमुयाण चंदो मोहतमविणासणेक्करवी ॥१७॥ सिद्धिवहुनेहनिब्भरसुसाहुगणनिच्चनमियपयकमलो । संपत्तो रायगिहं सुहंमसामी गणहरिंदो ॥१८॥ रायगिहतिलयभूए गुणसिलए चेइए समोसरिओ । नीहरिओ नयरजणो वंदणभत्तीए अह गुरुणो ॥१९॥ नवजलहरगंभीरस्सरेण अह वियसिओ सिहंडि व्व । गुरुणो आगमणेणं जंबुकुमारो नियमणेणं ॥२०॥ पवररहसमारूढो नीहरिओ पुरवराओ अह कुमरो । दूराओ मुक्करहो गुरुणो आसन्नमल्लीणो ॥२१॥
Jain Education International 2010_02
For Private & Personal Use Only
www.jainelibrary.org
