Page Text
________________
छट्ठो उद्देसओ
नरनाहस्स बहुमओ दीणाणाहाण वच्छली णिच्चं । जिणवयणामयकुसलो तत्थत्थिब्भो उसहदत्तो ॥१०॥ णिम्मलसीलाहरणा जिणवरवरर (व?)यणकन्नलंकरणा ।
रूयगुणनिज्जियरई, दइया अह धारिणी तस्स ॥११॥ सा य विउत्ता इत्थीसहावत्तणेण य अवच्चत्थं परिझिज्झिउं पयत्ता । तओ उसहदत्तो नायपरमत्थो तीए विणोयणत्थं वेभारगिरिवरे जिणभवणचेइयवंदणेणं रंमुज्जाणकिलाविणोएण य महया विभूईए पवरजाणवाहणसमारूढो पइदिणं गच्छमाणो तं विणोएइ । अन्नया य वेभारगिरिवरउज्जाणसमीवे दिट्ठो उसहदत्त-धारिणीहिं जसमित्तो नाम सावगो, पुच्छियो य-'कहिं तुमं पत्थिओ ? ।' तेण भणियं- 'इहेव उज्जाणे भगवओ महावीरवद्धमाणसामिणो जिणवरस्स पंचमसीसो भगवं सुहंमसामी गणहरो समोसरिओ। ता तस्स वंदणणिमित्तं पत्थिओ'त्ति । इमं च निसामिऊण उसहदत्तो वि सह धारिणीए चलिओ सुहंमसामिणो वंदणणिमित्तं । गंतूण य वंदिओ भगवं सव्वेहिं । भगवया वि पारद्धा अहिंसाइया धंमएसणा । तस्स विरामे पुच्छिओ भगवं जसमित्तसावगेणं-'भगवं जीसे जंबूए नामेण इमं जंबुद्दीवं पसिद्धं तीसे किं परिणामरूवं सरूवं?' भगवया वि सवित्थरं साहियं जहा, जंबुद्दीववन्नत्तिए । एत्थंतरंमि पुत्तजंमाहिकंखिणीए पुच्छियं धारिणीए-'भगवं ! किं मम पुत्तो होही नव' त्ति ? इमं च निसामिऊण सिद्धपुत्तेण भणियं जसमित्तसावगेण-'अहो धारिणिसाविगे! सावज्जं जाणंता वि न साहंति साहुणो। ता अहं तुम्हाणं जिणोवएसेण साहेमो । जहा य तुमे पुच्छियं तहा अवस्सं ते पुत्तो भविस्सइ । जओ अरिहंत-सिद्ध-आयरिय-उवज्झायसाहु-चक्कवट्टि-बलदेव-वासुदेवनामुक्कित्तणाणंतरं, तहा जंबु- महासमुद्द-पव्वयजिणभवणादिपसत्थनामाणंतरं च जा कीरइ पसत्था पण्हा, तीए अत्थि संपत्ती । ता साहूणं पुरओ जंबुदुमनामवन्नणनामगहणाणंतरं च पसत्थसउणेहि य तए पुच्छियं तहा अवस्सं भविस्सइ ते पुत्तो । अन्नं च-एस ते पच्चओ, जंबूफलाइ तुम(मं) सुमिणंतरे दट्ठण विउज्झिहिसि' । एयं च निसामिऊण भणियं धारिणीए-'भयवं! जइ इमं एवं, ता अहं जंबूदेवयाए नामेण अट्ठत्तरसयं अंबिलाणं काहामि । तहा सव्वरयणकंचणमयं जंबुदुमं जिणहरं जिणपडिमाओ य कराविस्सं । तओ वंदिऊण भगवंतं पविट्ठाणि नयरं । एवं च हरिसनिब्भराए धारिणीए पुत्तजंमसूयगसुमिणदसणमणाए य गच्छइ कालो' ।
Jain Education International 2010_02
For Private & Personal Use Only
www.jainelibrary.org
| SR No. | 002554 |
| Book Title | Jambuchariyam |
| Original Sutra Author | N/A |
| Author | Jinvijay, Chandanbalashree |
| Publisher | Bhadrankar Prakashan |
| Publication Year | 2009 |
| Total Pages | 318 |
| Language | Sanskrit |
| Classification | Book_Devnagari & Literature |
| File Size | 12 MB |