________________
७५
पंचमो उद्देसो
वच्छत्थलपिहुलविरायमाणवरहारधवलियदिसोहो । पहरिसवसवियसियरुइरमाणदिप्पंतमुहकमलो ॥२८१॥ अच्चतरुइरअंगयमणिकिरणाबद्धगयणसुरचावो । ईसिवियसन्तउट्ठउडदसणजुइपयडियमयूहो ॥२८२॥ इय नच्चिउं पयत्तो, तह जह देवा वि विम्हयं नीया । जिणवद्धमाणपुरओ, सहरिसउब्भिन्नरोमंचो ॥२८३॥ किंकरदेवेहि तओ, पारद्धं वाइउं महातूरं ।
सयलदिसिपूरियरवं, सुरलोयाउज्जमहघोसं ॥२८४॥ काणि पुण तत्थ आतोज्जाणि पवायाइं ?, अवि य
भंभामउंदमद्दलझल्लरिवरपवणसंखजयघंटा । कंसालभेरिकाहलडक्कावप्पीसवंसा य ।।२८५॥ कंसियकरडहुडुक्का, तिलिमा वीणा य मुरवदडुरडा । दुंदुहिमाई सव्वे, पवाइया देवआउज्जा ॥२८६॥ एवं च नच्चमाणं, पुणो पुणो नियकुलं पसंसंतं । दट्टण सुरं नरनाहसेणिओ पुच्छइ जिणिदं ॥२८७॥ भयवं ! किमेस जक्खो, नच्चइ नियकुलपसंसणं काउं । भणियं च जिणिदेणं, सेणिय ! एत्थेव आसि पुरे ॥२८८॥ गुत्तमइनाम मित्तो(इब्भो?), तस्स सुया उसभदत्त-जिणयत्ता । जिणयत्तो अइवसणी, सेट्ठो उण उसहदत्तो त्ति ॥२८९॥ पउरजणस्स य पउरं, जिणयत्तो बाहिरो कओ तेण । जूयाईसु पसत्तो, अह अच्छइ जूयटिटाए ॥२९०।। अह अन्नया कयाई, जूएणं कह वि सो रमेमाणो । आयविसंवायम्मी, पहओ मम्मम्मि अन्नेण ॥२९१॥ अह भणिओ सयणेणं, पडिवज्जसु उसहदत्त ता एयं । दारुणवसणावडियं, जसभाई जेण तं होसि ॥२९२॥
Jain Education International 2010_02
For Private & Personal Use Only
www.jainelibrary.org
