________________
७४
जंबुचरियम् काऊण एवमाई, सव्वं जं चेव तत्थे करणीयं ।
उवभुंजिउमाढत्तो, भोए सो तत्थ पंचविहे ।।२६९।। केरिसाहिं य सह दइयाहिं ?, अवि य
पीणुन्नयचक्कलथणहरगुरुभारकि(क्कि)लंतमज्झाहिं । ससहरमऊहसन्निभदसणविरायंतजुण्हाहिं ॥२७०॥ दीहरपम्हलनिम्मलधवलविरायंतनयणजुयलाहिं । अइसुरहिपवरनीसासपरिमलुग्गारवयणाहिं ॥२७१।। पिहुलनियंबयडट्ठियरसणावरपुन्नदसदिसिमुहाहि । गंभीरनाहिकुंडलतिवलिविरायंतमज्झाहिं ॥२७२॥ इय एरिसमणहरकामिणीहिं वड्डन्तगरुयरायाहि । सह भुजंतो भोए, गयं पि कालं न याणाइ ॥२७३।। एएण कमेण तओ, कमेण पत्ताइं दस वि अयराइं । तेणेस अहियतेओ, सेणिय ! इंदस्समो जेण ॥२७४॥ तो नरवरिंद सेणिय !, एसो चविऊण सत्तमदिणम्मि । उसहदत्तस्स होही, धारणिजायाए वरपुत्तो ॥२७५।। एसो चरमसरीरो, तवबलसम्मत्तगुणसयाइन्नो । उप्पन्नकेवलवरो, सिद्धिपुरं पाविही अमलो ॥२७६ अवसप्पिणीइमाए, भरहे वासम्मि केवली चरिमो । एसो होही सेणिय !, तेणेणं छिज्जिही नाणं ॥२७७॥ जंबुद्दीवाहिवई, सोऊण इमं अणाढिओ जक्खो । कयबाहुगरुयसद्दो, अहुट्ठिओ सुरवरो सहसा ॥२७८।। काऊण तत्थ तिवलिं, अहो कुलं मज्झ उत्तमं भणिउं ।
पयपहरकंपियधरो, सहसा नट्टं समाढत्तो ॥२७९॥ तओ सो केरिसो दीसिउं पयत्तो नच्चमाणो ?, अवि य
घोलन्तकन्नकुंडलमरगयमणिकिरणमासलकवोलो। रहसवसभारविगलियमुत्ताहलदिन्नखी(न्नरवि)पयरो ॥२८०॥
Jain Education International 2010_02
For Private & Personal Use Only
www.jainelibrary.org
