________________
७२
जंबुचरियम् "आहारविरहियस्स य, होइ सरीरस्स नूण परिवडणं ।
अणवज्जो आहारो, न निसिद्धो जिणवरिंदेहिं" ॥२५१॥ [ ] जओ सो कप्पइ जईणं पि । ता तुमं पि एत्थ ठिओ चेव अणवज्जाहारेण सरीरसंधारणामेत्तं परिभुंजमाणो रागदोसविरहिओ अविराहओ चेव जिणाणणाए, नेव्वाणफलसाहगो य । ता कुणसु एयं' ति । कुमारेण भणियं-'कुओ मम एयं फासुयमेसणिज्जं संपज्जइ इह ट्ठियस्स ?' भणियं च तेण-'कुमार ! मा विसायं वच्च, अहं साहुकिरियाकुसलो अज्जप्पभिई तुम(म्ह) साहुभूयाणं सीसो अणवज्जेणं भत्तपाणेणं सव्वं जहाजोगं पयत्तं करिस्सं, ता पडिवज्जसु इमं आहारगहणं' ति । कुमारेण भणियं-'सोम ! तुमं तावेत्थ कप्पाकप्पविहिकुसलो, जाणसि जहट्ठियं सव्वं; ता जइ मया अवस्स भोत्तव्वं ता छट्ठभत्तस्स आयंबिलेण पारणगं एसो मम जावज्जीवं पि अभिग्गहविसेसो' । पडिवन्नं च इमं दढधम्मेण, निवेइयं च राइणो जहापडिवन्नं कुमारेण भोयणं । तओ हरिसिओ राया, कयं महाविभूईए वद्धावणयं कुमारस्स य उग्गतवनिरयस्स पइन्नामंदिरमहासिहरसमारूढस्स जहापडिवन्नविहीए पारणयं कुणंतस्स जिणवयणं भावेमाणस्स जीवाजीवासवसंवराइणो पयत्थे दढधम्मोवएसिए पइदिणं निसामेमाणस्स अंतेउरमज्झगयस्स । तओ सो निययजायाहिं उवलोहिऊण पारद्धो विसयनिमित्तं । केरिसाहिं य ताहिअवि य- सविलासहसियजंपियविब्भममयचित्तजणियतोसाहिं ।
उन्नयपीणनिरंतरथणहरगुरुभारसुढियाहिं ॥२५२॥ कप्पूरपउरकुंकुमकुरंगमयवहलरंजियतणूहि । वेल्लहलसरलकोमलकनयप्पहदेहलइयाहिं ॥२५३|| घोलन्तकन्नकुंडलरयणपहापडय(ल)रंजियदिसाहिं । रसणाकलावनेउरकलरववरहंसिगमणाहिं ॥२५४॥ अणवरयविसज्जियघोलमाणसकडक्खनयणबाणाहिं । बहुसो वि पासपरिसंठियाहिं न वि खोहिओ ताहि ॥२५५॥ इय सो लडहविलासिणिनिब्भरराएण लोहविज्जतो । बारसवासाइं ठिओ, ग[य]णं व मलेण न विल(लि)त्तो ॥२५६।।
Jain Education International 2010_02
For Private & Personal Use Only
www.jainelibrary.org
