________________
વિપર્યય
૩૩ સિતાર, મંજીરાં વગેરેના સાજ વડે તેમણે વ્રજ ભાષાનાં પદો ગાવાનું શરૂ કર્યું. કેટલાક શબ્દોના ઉચ્ચારો તેમને ફાવતા ન હતા, પરંતુ ગાવામાં તેમની તન્મયતા દેખાઈ આવતી હતી. કેટલાકે ઊભા થઈ તાનમાં આવી જઈ તાળીઓ સાથે કે મંજીરાં સાથે કે ઢોલક સાથે નાચવાનું શરૂ કર્યું. ગોરી ચામડીના યુવાનોને આ બધું કરતાં જોઈ અમારી છાતી ફૂલતી હતી. કાર્યક્રમ પછી પ્રસાદ આપવામાં આવ્યો. તે કાંદાલસણ વિનાનો શુદ્ધ શાકાહારી હતો. હરે કૃષ્ણ સોસાયટીમાં જોડાનારાઓએ સિગરેટ, દારૂ, માંસ વગેરે હંમેશને માટે છોડવાનાં હોય છે. આ અમેરિકી યુવાનોએ તે બધું છોડ્યું હતું. સોસાયટીમાં કેટલાક તો પોતાનું ઘર પણ છોડીને, બ્રહ્મચર્ય-વ્રત ધારણ કરીને આજીવન સાધુ થઈને રહેતા હોય છે, અને સંસ્થા જ્યારે જ્યારે જ્યાં જ્યાં મોકલે ત્યાં ત્યાં તેઓ જતા હોય છે.
બહાર નીકળી પછી આખે રસ્તે મારા મનમાં વિચાર ઘોળાતો હતો કે લટકામાં સંસ્કૃતિઓનો કેટલો મોટો વિપર્યય પાસે પાસે જોવા મળ્યો ! એક તરફ સ્વેચ્છાએ પશ્ચિમની સંસ્કૃતિથી રંગાઈ ગયેલા કેટલાક ભારતીય લોકો હતા અને બીજી બાજુ સ્વેચ્છાએ ભારતીય ધર્મ અને સંસ્કૃતિ સાથે એકરૂપ બની ગયેલા કેટલાક અમેરિકીઓ હતા. આવો વિપર્યય ભારતમાં નથી, એમ નહિ. દુનિયાના બીજા ઘણા દેશોમાં અને બીજી સંસ્કૃતિઓ વચ્ચે પણ તે જોવા મળશે જ. પરંતુ લટકામાં પાસપાસેના સ્થળે અને સમયના થોડા અંતરે જ તે જોવા મળ્યો માટે એની છાપ ચિત્તમાં ઘેરી પડી.
For Private & Personal Use Only
Jain Education International
www.jainelibrary.org
