________________
૨૫ જિપ્સી સાથે ફોટો
હોંગકોંગ એટલે ચીનાઓનું શહેર. અંગ્રેજોએ જ્યારથી એને પોતાના તાબામાં લીધેલું ત્યારથી બાકીના ચીન કરતાં એની ભાત બદલાઈ ગયેલી. સામ્યવાદી ચીનાઓએ ચાંગકાઈ શેકને દૂર કરી સમગ્ર ચીનનો કબજો લીધો ત્યારે પણ હોંગકોંગને તેઓ અડ્યા નહિ. છેલ્લાં કેટલાંક વર્ષોમાં હોંગકોંગની વધતી જતી વસ્તીને લક્ષમાં લઈ ચીને હોંગકોંગને પાણીનો પુરવઠો આપ્યો છે અને થોડી જમીન પણ આપી છે.
હોંગકોંગ એ બંદર છે. નાનકડા ટાપુઓ પર વસેલું શહેર છે. કાઉલુન અને હોંગકોંગ એ એના બે મુખ્ય ટાપુઓ છે. એક ટાપુ પરથી બીજા ટાપુ પર જવા માટે થોડી થોડી વારે સ્ટીમર મળે છે. હવે તો ભૂગર્ભ (અથવા જલગર્ભ) રસ્તો પણ થયો છે. સમુદ્રની નીચે લગભગ સિત્તેર ફૂટ ઊંડે સુધી જતો અને બંને ટાપુઓને જોડતો રસ્તો આખો દિવસ મોટરગાડીઓથી સતત
ધમધમે છે.
હોંગકોંગમાં આયાત-જકાત નથી. ‘ડ્યૂટી ફ્રી' શહેર હોવાને કારણે દુનિયાભરનો માલ રોજ અહીં આવે છે અને રોજ અહીં ખરીદી કરનારા વિદેશીઓ પણ ઊમટે છે. ‘શૉપર્સ પેરેડાઇઝ' તરીકે હોંગકોંગ એટલા માટે ઓળખાય છે. અલબત્ત, સસ્તું ખરીદવાની ધૂનમાં નીકળેલા માણસો નકલી માલથી અહીં એટલા જ છેતરાય છે.
હોંગકોંગમાં ફરવા માટે ટાયગર બામ ગાર્ડન, ઓશન પાર્ક વગેરે સુંદર સ્થળો છે. આ ઉપરાંત તેની ટૂરિસ્ટ કંપનીઓ પ્રવાસીઓને પંદરેક માઇલ દૂર આવેલી ચીની સરહદ જોવા લઈ જાય છે.
ચીની સરહદ માટેના આ પ્રવાસમાં હું અને મારો મિત્ર જોડાઈ ગયા. અલબત્ત, સરહદ જોવામાં કોઈ નવીનતાની અપેક્ષા ન હતી, પરંતુ એ નિમિત્તે શહેર બહારની ચીની દુનિયા જોવાનું આકર્ષણ હતું.
અમારી બસમાં દેશદેશના પ્રવાસીઓ હતા. અમારી બસ હોંગકોંગના મધ્ય ભાગમાંથી નીકળી ગામડાંઓ તરફ ચાલવા લાગી. હોંગકોંગમાં કેટલાક વિસ્તારોમાં શ્રીમંતાઈ દેખાઈ, પરંતુ ગામડાંઓમાં તો નરી ગરીબી જ હતી.
Jain Education International
For Private & Personal Use Only
www.jainelibrary.org
