Page Text
________________
पासतित्थे पएसिकहाणगं
२८७
त्ति कटु आलोइय-पडिक्कते, समाहिपत्ते, काल-मासे कालं किच्चा सोहम्मे कप्पे, सूरियाभे विमाणे उववाय-सभाए-जाव-उबवण्णो । तए णं से सूरियाभे देवे अहुणोववन्नए चेव समाणे पञ्चविहाए पज्जत्तीए पज्जत्तिभावं गच्छइ । तं जहा-आहार-पज्जत्तीए सरीरपज्जत्तीए इन्दिय-पज्जत्तीए आण-पाण-पज्जत्तीए भासा-मण पज्जत्तीए। तं एवं खलु भो सूरियाभेणं देवेणं सा दिव्वा देविड्ढी, दिव्वा देव-जुई, दिव्वे देवाणुभावे लद्धे, पत्ते, अभिसमन्नागए" ।
सूरियाभदेवभवाणंतरं पएसिरायजीवस्स दढपइन्नभवे मोक्खगमणनिरूवणं "सूरियाभस्स णं भंते ! देवस्स केवइयं कालं ठिई पन्नत्ता ?" "गोयमा ! चत्तारि पलिओवमाई ठिई पन्नता"। "से णं सूरिया देव ताओ देव-लोगाओ आउ-क्खएणं, भव-क्खएणं, ठिइ-क्खएणं अणंतरं चयं चइत्ता कहिं गमिहिइ, कहिं उववज्जिहिइ?" गोयमा ! महाविदेहे वासे जाणि इमाणि कुलाणि भवंति, तं जहा-अड्ढाई, दित्ताई, विउलाई, वित्थिण्ण-विपुल-भवण-सयगासणजाण-वाहणाई, बहुधण-बहुजायरूव-रययाई, आओग-पओग-संपउत्ताई, विच्छड्डिय-पउर-भत्त-पाणाई, बहु-दासी-दास-गो-महिसगवेलग-प्पभूयाई, बहु-जगस्स अपरिभूयाई, तत्थ अन्नयरेसु कुलेसु पुत्तत्ताए पच्चायाइस्सइ। तए णं तंसि दारगंसि गभगयंसि चेव समाणंसि अम्मा-पिऊणं धम्मे दढा पइन्ना भविस्सइ। तए णं तस्स दारगस्स नवण्हं मासाणं बहुपडिपुण्णाणं, अट्ठमाण राइंदियागं, वीइक्कंताणं, सुकुमाल-पाणिपाय, अहीण-पडिपुण्णपंचिदिय-सरोरं, लक्खण-वंजण-गुणोववेयं, मागुम्माण-पमाण-पडिपुण्ण-सुजाय-सव्वङ्ग-सुंदरं, ससि-सोमाकारं, कंतं, पिय-दंसणं, सुरुवं दारयं पयाहिइ। तए ण तस्स दारगस्स अम्मा-पियरो पढमे दिवसे ठिइ-वडियं करेहिति । तइय-दिवसे चंद-सूर-दसणगं करिस्सन्ति । छठे दिवसे जागरियं जागरिस्तति । एक्कारसमे दिवसे वीइक्कते, संपत्ते, बारसाहे दिवसे, निवित्ते, असुइ-जाय-कम्म-करणे, चोक्खे, संमज्जिओवलिते, विउलं असण-पाण-खाइम-साइमं उवक्खडा वेस्पति, मित्त-नाइ-नियग-सबग-संबंधि-परियणं आमंतेत्ता, तओ पच्छा व्हाया कयबलिकम्मा-जाव-अलंकिया, भोयण-मंडवंसि सुहासण-वर-गया, तेण मित्त-नाइ-जाव-परिजणेण सद्धि विउलं असणं-जाव-साइमं आसाएमाणा, विसाएमाणा, परिभुजेमाणा, परिभाएमाणा एवं चेव णं विहरिस्संति । जिमिय-भुत्तत्तरागया वि य णं समाणा आयंता, चोक्खा, परम-सुइ-भूया तं मित्त-नाइ-जाव-परियणं विउलेणं वत्थ-गन्ध-मल्लालंकारेणं सक्कारेस्संति, संमाणिस्सन्ति, तस्सेव मित्त -जाव-परियणस्स पुरओ एवं वइस्संतिजम्हा णं देवाणुप्पिया ! इमंसि दारगंसि गम्भगयंसि चेव समाणंसि धम्मे दढा पइन्ना जाया, तं होउ णं अम्हं एयस्स दारयस्स दढपइन्ने नामेणं । तए णं तस्स दढपइन्नस्स दारगस्स अम्मा-पियरो नामधेज्ज करिस्संति-दढपइन्नो य दढपइन्नो य । तए णं तस्स अम्मा-पियरो अणुपुव्वेणं ठिइ-वडियं च चंद-सूरिय-दरिसणं च धम्म-जागरियं च नामधेज्ज-करणं च पजेमणगं च पजपणगं च पडिवद्धावणगं च पचंकमणगं च कण्ण-वेहणं च संवच्छर-पडिलेहणगं च चूलोवणयं च अन्नाणि य बहूणि गन्भाहाणजम्मणाइयाइं महया इड्ढीसक्कार-समुदएणं करिस्संति ॥ तए णं से दढपइन्ने दारए पंच-धाई-परिक्खिते-खीर-धाईए, मज्जण-धाईए, मंडण-धाईए, अंक-धाईए, कीलावणधाईए, अन्नाहि य बहूहि खुज्जाहि, चिलाइयाहिं, वामणियाहिं, वडभियाहि, बबरीहि, बउसियाहि, जोण्हियाहिं, पग्णवियाहि, ईसिगिणियाहिं, वारुणियाहिं, लासियाहि, लउसियाहिं, दमिलीहि, सिंहलीहि, आरबोहि, पुलिदोहि, पक्कणीहि, बहलोहिं, मुरंडोहि, सबरीहि, पारसीहि, नाणादेसी-विदेस-परिमंडियाहिं, सदेस-नेवत्थ-गहिय-वेसाहि, इंगिय-चितिय-पत्थिय-वियाणाहि, निउण-कुसलाहिं, विणीयाहिं चेडिया-चक्कवाल-तरुणि-बंद-परियाल-परिवुडे, वरिसधर-कंचुइ-महयर-वंदपरिक्खित्ते, हत्थाओ हत्थं साहरिज्जमाणे, साहरिज्जमाणे उवनच्चिज्जमाणे उवनच्चिज्जमाणे अंकाओ अंक परिभुज्जमाणे परिभुज्जमाणे उवगिज्झमाणे उवगिज्झमाणे उवलालिज्जमाणे उवलालिज्जमाणे उवगहिज्जमाणे उवगृहिज्जमाणे, अवयासिज्जमाणे अवयासिज्जमागे परियंदिज्जमाणे परियंदिज्जमाणे, परिचुंबिज्जमाणे परिचुंबिज्जमाणे, रम्मेसु मणि-कोट्टिम-तलेसु परंगमाणे परंगमाणे, गिरि-कंदरमल्लीणे विव चंपग-वर-पायवे, निवाय-निव्वाघायंसि सुह-सुहेणं परिवढिस्सइ। तए णं तं दढपइन्नं दारगं अम्मा-पियरो साइरेग-अट्ठ-वास-जायगं जाणित्ता सोभणंसि तिहि-करण-नक्खत्त-मुहुत्तंसि हायं सव्वालंकार-विभूसियं करेत्ता, महया इड्ढी-सक्कार-समुदएणं कलायरियस्स उवणेहिति ।
Jain Education International
For Private & Personal Use Only
www.jainelibrary.org
| SR No. | 001954 |
| Book Title | Dhammakahanuogo |
| Original Sutra Author | N/A |
| Author | Kanhaiyalal Maharaj, Dalsukh Malvania |
| Publisher | Agam Anuyog Prakashan |
| Publication Year | |
| Total Pages | 810 |
| Language | Prakrit |
| Classification | Book_Devnagari, Agam, Canon, Story, Literature, & agam_related_other_literature |
| File Size | 20 MB |