Page Text
________________
२८४
धम्मकहाणुओगे चउत्थो खंधो
"एवं खलु भंते ! मम अज्जगस्स एसा सन्ना-जाव-समोसरणे, जहा तं जीवो, तं सरीरं, नो अन्नो जीवो, अन्नं सरीरं । तयणंतरं च णं ममं पिउणो वि एसा सन्ना। तयणंतरं मम वि एसा सन्ना-जाव-समोसरणे । तं नो खलु अहं बहु-पुरिस-परंपरागयं कुलनिस्सियं दिट्टि छंडस्सामि"। तए णं केसी कुमार-समणे पएसि रायं एवं वयासी"मा तुम पएसी! पच्छाणुताविए भवेज्जासि जहा व से पुरिसे अय-हारए"। "के णं भंते ! से अय-हारए ?" "पएसी! से जहा-नामए केई पुरिसा अत्थत्थी, अत्थ-गवेसी, अत्थ-लुद्धगा, अत्थ-कंखिया, अत्थ-पिवासिया, अत्थ-गवेसणयाए विउलं पणिय-भंडमायाए सुबहुं भत्त-पाण-पत्थयणं गहाय, एगं महं अगामियं, छिन्नावायं, दीहमद्धं अडवि अणु-पविटा। तए णं ते पुरिसा तोसे अगामियाए अडवीए कंचि देसं अणुप्पत्ता समाणा, एगं महं अयागरं पासंति, अएणं सव्वओ समंता आइण्णं, विस्थिग्णं, सच्छडं, उवच्छडं, फुडं, गाढं, अवगाढं, पासंति, पासित्ता हट्ठ-तुट्ठ-जाव-हियया अन्नमन्नं सहावेति, सहावित्ता एवं वयासी-- "एस णं देवाणुप्पिया! अय-भंडे इट्टे, कंते-जाव-मणामे। तं सेयं खलु देवाणुप्पिया! अम्हं अय-भारए बंधित्तए" त्ति कट्ट अन्नमन्नस्स एयमळं पडिसुणेति, पडिसुणेत्ता अय-भारं बंधंति, बंधित्ता अहाणुपुवीए संपत्थिया। तए णं ते पुरिसा तीसे अगामियाए-जाव-अडवीए कंचि देसं अणुप्पत्ता समाणा एगं महं तउआगरं पासंति, तउएणं आइण्णं तं चेव-जाव-सद्दावेत्ता एवं वयासी-- "एस णं देवाणु प्पिया! तउय-भंडे-जाव-मणामे। अप्पेणं चेव तउएणं सुबहु अए लम्भइ। तं सेयं खलु देवाणुप्पिया ! अय-भारए छड्डेत्ता तउय-भारए बंधित्तए"। त्ति कटु अन्नमन्नस्स अंतिए एयमढें पडिसुणेति, अय-भारं छड्डेन्ति, तज्य-भारं बंधति । तत्थ णं एगे पुरिसे नो संचाएइ अय-भारं छड्डित्तए, तउय-भारं बंधित्तए। तए णं ते पुरिसा तं पुरिसं एवं वयासी-- "एस णं देवाणुप्पिया! तउय-भंडे-जाव-सुबहुं अए लब्भइ। तं छहेहि णं देवाणप्पिया! अय-भारगं, तउप-भारगं बंधाहि। तए णं से पुरिसे एवं वयासो-- 'दूराहडे मे देवाणुप्पिया ! अए; चिराहडे मे देवाणुप्पिया ! अए; अइ-गाढ-बंधण-बद्धे मे देवाणुप्पिया ! अए; असिलिट्ठ-बंधणबद्ध मे देवाणुप्पिया ! अए; धणिय-बंधण-बद्धे मे देवाणुप्पिया ! अए; नो संचाएमि अय-भारगं छड्डेत्ता, तउय-भारगं बंधित्तए। तए णं ते पुरिसा तं पुरिसं जाहे नो संचाएंति बहूहिं आघवणाहि य पन्नवणाहि य आघवित्तए वा पनवित्तए वा, तया अहाणुपुवीए संपत्थिया। एवं तंबागरं, रुप्पागरं, सुवण्णागरं, रयणागरं, बइरागरं । तए ण ते पुरिसा जेणेव सया सया जणवया, जेणेव साइं साई नयराइं, तेणेव उवागच्छन्ति, उवागच्छित्ता बइर-विक्कयणं करेंति, करेत्ता सुबहु-दासी-दास-गो-महिस-गवेलगं गिव्हंति, गेण्हित्ता अट्ठ-तलमूसिय-बडिसगे कारावेति । व्हाया कयबलिकम्मा उप्पि पासायवर-गया, फुट्टमार्णोह मुइंग-मत्थएहि, बत्तीसइ-बद्धहि नाडएहि बर-तरुणी-संपउत्तेहि उवनच्चिज्जमाणा, उबलालिज्जमाणा, इट्टे सद्दफरिस-जाव-विहरंति॥ तए णं से पुरिसे अय-भारेण जेणेव सए नयरे तेणेव उवागच्छद। अय-विक्किगणं करेइ, करेत्ता तंसि अप्प-मोल्लंसि निहियंसि झीण-परिवए ते पुरिसे उप्पि पासाय-वर-गए-जाव-विहरमाणे पासइ, पासित्ता एवं वयासी-- 'अहो णं अहं अधन्ने, अपुण्णे, अकयत्थे अकय-लक्खणे, हिरि-सिरि-वज्जिए, होण-पुण्ण-चाउद्दसे, दुरंत-पंत-लक्खणे । जइ णं अहं मित्ताण वा नाईण वा नियगाण वा सुणेतओ, तो गं अहं पि एवं चेव उप्पि पासाय-वर-गए-जाव-विहरंतो'। से तेणठेणं पएसी! एवं वुच्चइ-“मा णं तुमं पएसो! पच्छाणुताविए भवेज्जासि जहा व से पुरिसे अय-हारए"।
पएसिरन्नो गिहिधम्मपडिवत्ती, रमणिज्ज-अरमणिज्जविसए वणसंडाइदिट्ठता य ५७ एत्थ णं से पएसी राया संबुद्धे केसि कुमार-समणं बंदइ एवं वयासी--
"नो खलु भंते! अहं पच्छाणुताविए भविस्सामि जहा व से पुरिसे अयहारए । तं इच्छामि णं देवाणुप्पियाणं अंतिए केवलि-पन्नत्तं धम्म निसामित्तए"।
Jain Education International
For Private & Personal Use Only
www.jainelibrary.org
| SR No. | 001954 |
| Book Title | Dhammakahanuogo |
| Original Sutra Author | N/A |
| Author | Kanhaiyalal Maharaj, Dalsukh Malvania |
| Publisher | Agam Anuyog Prakashan |
| Publication Year | |
| Total Pages | 810 |
| Language | Prakrit |
| Classification | Book_Devnagari, Agam, Canon, Story, Literature, & agam_related_other_literature |
| File Size | 20 MB |