Page Text
________________
२७२
धम्मकहाणुओगे चउत्थो खंधो
"एवं खल अहं भंते ! जियसत्तुणा रना पएसिस्स रन्नो इमं महत्थं-जाव-विसज्जिए तं चेव-जाव-समोसरह णं भंते ! तुब्भे सेयवियं नयरिं"। तए णं केसी कुमार-समणे चित्तेणं सारहिणा दोच्चं पि तच्चं पि एवं वुत्ते समाणे चित्तं सारहिं एवं वयासी-- “चित्ता! से जहा-नामए वण-सण्डे सिया किण्हे, किण्होभासे-जाव-पडिहवे । से नूणं चित्ता ! से वण-सण्डे बहूणं दुपय-चउप्पयमिय-पसु-पविख-सरोसिवाणं अभिगमणिज्जे?" "हंता अभिगमणिज्जें"। तंसि च णं चित्ता! वण-संडसि बहवे भिलंगा नाम पाव-सउणा परिवसन्ति, जे णं तेसि बहूर्ण दुपय-च उप्पय-मिय-पसु-पक्खिसिरीसिवाणं ठियाणं चेव मंस-सोणियं आहारेन्ति । से नूणं चित्ता! से वण-संडे तेसि णं बहूणं दुपय-जाव-सिरोसिवाणं अभिगमणिज्जे?" "नो तिणठे समझें।" "कम्हा णं?" "भंते! सोवसम्गे"। "एवामेव चित्ता! तुब्भं पि सेयवियाए नयरीए पएसी नाम राया परिवसइ, अहम्मिए-जाव-नो सम्मं कर-भर-वित्ति पवत्तेइ। तं फहं णं अहं चित्ता! सेयवियाए नयरीए समोसरिस्सामि?" तए णं से चित्ते सारही केसि कुमार-समणं एवं वयासी-- "कि णं भंते! तुब्भं पएसिणा रन्ना कायव्वं? अत्थि णं भंते ! सेयवियाए नयरीए अन्ने बहवे ईसर-तलवर-जाव-सत्थवाह-प्पभिइओ, जे णं देवाणुप्पियं बंदिस्संति-जाव-पज्जुवासिस्संति, विउलं असणं, पाणं, खाइमं, साइमं पडिलाभेसंति, पाडिहारिएण पोढफलग-सेज्जासंथारेणं उवनिमन्तिस्सन्ति"। तए णं से केसी कुमारसमणे चित्तं सारहिं एवं वयासी-- "अवि याइ चित्ता! समोसरिस्सामो” ।
चित्तसारहिस्स सेयवियानगरिआगमणं ३७ तए णं से चित्ते सारही केसि कुमार-समणं वंदइ, नमसइ, वंदित्ता नमंसित्ता केसिस्स कुमार-समणस्स अंतियाओ, कोट्ठयाओ चेइयाओ
पडिनिक्खमइ, पडिनिक्खमित्ता जेणेव सावत्थि णयरी जेणेव रायमग्गमोगाढे आवासे, तेणेव उवागच्छइ, उवागच्छित्ता कोडंबियपुरिसे सद्दावेइ, सद्दावित्ता एवं वयासी"खिप्पामेव भो देवाणुप्पिया ! चाउ-घंटे आस-रहं जुतामेव उवट्टवेह" । जहा सेयवियाए नयरीए निग्गच्छइ तहेव-जाव-वसमाणे वसमाणे कुणालाजणवयस्स मज्झं-मज्झेणं, जेणेव केइयअद्धे जणवए, जेणेव सेयविया नयरी, जेणेव मियवणे उज्जाणे, तेणेव उवागच्छद, उवागच्छित्ता उज्जाण-पालए सद्दावेइ, सद्दावित्ता एवं वयासी-- "जया णं देवाणुप्पिया! पासावच्चिज्जे केसी नाम कुमार-समणे पुन्वाणुपुब्वि चरमाणे, गामाणुगाम दूइज्जमाणे इहमागच्छिज्जा, तया णं तुभे देवाणुप्पिया! केसि कुमार-समणं वंदिज्जाह, नमंसिज्जाह, वंदित्ता नमंसित्ता अहा-पडिरूवं उग्गहं अणुजाणेज्जाह। पाडिहारिएणं पीढ-फलग-जाव-उवनिमंतेज्जाह। एयमाणत्तियं खिप्पामेव पच्चप्पिणेज्जाह"। तए णं ते उज्जाण-पालगा चित्तेण सारहिणा एवं वुत्ता समाणा हट्टतुट-जाव-हियया करयल-परिग्गहियं-जाव-एवं वयासी--"तह"
त्ति। आणाए, विणएणं वयणं पडिसुणंति ॥ ३८ तए णं से चित्ते सारही जेणेव सेयविया नयरी, तेणेव उवागच्छइ, उवागच्छित्ता सेयवियं नरि मज्झं-मज्झेणं अणुपविसइ, अणु
पविसित्ता जेणेव पएसिस्स रन्नो गिहे, जेणेव बाहिरिया उवट्ठाणसाला, तेणेव उवागच्छइ, उवागच्छित्ता तुरए निगिण्हइ, निगिहित्ता रहं ठवेइ, ठवित्ता रहाओ पच्चोरहइ, पच्चोरुहिता तं महत्थं-जाव-गेव्हइ, गेण्हित्ता जेणेव पएसी राया, तेणेव उवागच्छइ, उवागच्छित्ता पएसि रायं करयल-जाव-बद्धावेत्ता तं महत्थं-जाव-उवणेइ। तए णं से पएसी राया चित्तस्स सारहिस्स तं महत्थं-जाव-पडिच्छइ, पडिच्छित्ता चित्तं सारहिं सक्कारेइ, संमाणेइ, सक्कारेत्ता सम्माणेत्ता पडिविसज्जेइ ।
Jain Education International
For Private & Personal Use Only
www.jainelibrary.org
| SR No. | 001954 |
| Book Title | Dhammakahanuogo |
| Original Sutra Author | N/A |
| Author | Kanhaiyalal Maharaj, Dalsukh Malvania |
| Publisher | Agam Anuyog Prakashan |
| Publication Year | |
| Total Pages | 810 |
| Language | Prakrit |
| Classification | Book_Devnagari, Agam, Canon, Story, Literature, & agam_related_other_literature |
| File Size | 20 MB |