Page Text
________________
महावीरतित्थे समुद्दपालीयस्स कहाणयं
११५
बावत्तरी कलाओ य, सिक्खई नीइकोविए । जुव्वणेण य संपन्ने, सुरूवे पियदंसणे ॥६॥ तस्स रूववई भज्जं, पिया आणेइ रूविणि । पासाए कोलए रम्मे, देवो दोगुंदुओ जहा ॥७॥
बज्झदसणेण वेरग्गं पव्वज्जा य ४६४ अह अन्नया कयाई, पासायालोयणे ठिओ। वज्झमंडणसोभाग, वसं पासइ वज्झगं ॥८॥
तं पासिऊण संविग्गो, समुद्दपालो इणमब्बबी । अहोऽसुहाण कम्माणं, निज्जाणं पावगं इमं ॥९॥ संबुद्धो सो तहि भयवं, परमसंवेगमागओ । आपुच्छऽम्मापियरो, पब्वए अणगारियं ॥१०॥ जहित्तु संगं च महाकिलेसं, महंतमोहं कसिणं भयावहं। परियायधम्म चऽभिरोयएज्जा, वयाणि सीलाणि परीसहे य ॥११॥ अहिंस सच्चं च अतेणगं च, तत्तो य बंभं अपरिग्गहं च । पडिवज्जिया पंचमहन्वयाणि, चरिज्ज धम्मं जिणदेसियं विऊ ॥१२॥ सव्वेहि भूएहि दयाणुकंपी, खंतिक्खमे संजयबंभयारी । सावज्जजोगं परिवज्जयंतो, चरिज्ज भिक्खू सुसमाहिइंदिए ॥१३॥ कालेण कालं विहरेज्ज रट्टे, बलाबलं जाणिय अप्पणो य । सीहो व सद्देण न संतसेन्जा, वयजोग सुच्चा न असब्भमाहु ॥१४॥
परीसहसहणं सिद्धी य ४६५ उवेहमाणो उ परिव्वइज्जा, पियमप्पियं सव्व तितिक्खइज्जा । न सव्व सम्वत्थऽभिरोयइज्जा, न यावि पूर्य गरहं च संजए ॥१५॥
अणेगछंदा इह माणहिं, जे भावओ से पगरेइ भिक्खू । भयभेरवा तत्थ उइंति भीमा, दिव्वा मणुस्सा अदुवा तिरिच्छा ॥१६॥ परीसहा दुव्विसहा अणेगे, सीयंति जत्था बहुकायरा नरा। से तत्थ पत्ते न बहिज्ज भिक्खू, संगामसीसे इव नागराया ॥१७॥ सीओसिणा बंस-मसा य फासा, आयंका विविहा फुसंति देहं। अकुक्कुओ तत्थऽहियासएज्जा, रयाई खेवेज्ज पुराकयाई ॥१८॥ पहाय रागं च तहेव दोस, मोहं च भिक्खू सययं वियक्खणो। मेरु व्व बाएण अकंपमाणो, परीसहे आयगुत्ते सहेज्जा ॥१९॥ अणुन्नए नावणए महेसी, न यावि पूर्य गरहं च संजए। से उज्जुभावं पडिवज्ज संजए, निव्वाणमग्गं विरए उवेइ ॥२०॥ अरइ-रइसहे पहीणसंथवे, विरए आयहिए पहाणवं । परमट्ठपहि चिट्ठई, छिन्नसोए अममे अकिंचणे ॥२१॥ विवित्तलयणाइ भएज्ज ताई, निरोवलेवाइं असंथडाइं। इसीहिं चिण्णाई महायसेहि, काएण फासेज्ज परीसहाई ॥२२॥ सन्नाणनाणोवगए महेसी, अणुत्तरं चरित्रं धम्मसंचयं । अणुत्तरे नाणधरे जसंसी, ओभासई सूरिए वंऽतलिक्खे ॥२३॥ दुविहं खवेऊण य पुण्णपावं, निरंगणे सव्वओ विप्पमुक्के । तरिता समुदं व महाभवोह, समुद्दपाले अपुणागमं गए ॥२४॥
त्ति बेमि॥ उत्तर० अ० २१ ।
३४. महावीरतित्थे मियापुत्ते बलसिरी समणे
४६६ सुग्गीवे नयरे रंमे, काणणुज्जाणसोहिए । राया बलभद्दित्ति, मिया तस्सग्गमहिसी ॥१॥
तेसि पुत्ते बलसिरी, मियापुत्ते ति विस्सुए । अम्मापिऊण दइए, जुवराया दमीसरे ॥२॥ नंदणे सो उ पासाए, कोलए सह इहिं । देवो दोगुंदुगो चेव, निच्चं मुइय-माणसो ॥३॥ मणि-रयण-कोट्टिमतले, पासायालोयणट्ठिओ । आलोएइ नगरस्स, चउक्क-तिय-चच्चरे ॥४॥
समणं दट्ट ण जाईसरणं ४६७ अह तत्थ अइच्छतं, पासई समण-संजयं । तव-नियम-संजमधरं, सीलड्ढं गुणआगरं ॥५॥
तं पेहई मियापुत्ते, दिट्ठीए अणिमिसाए उ । कहिं मन्नेरिसं रूवं, दिट्ठपुव्वं मए पुरा। ॥६॥ साहस्स दरिसणे तस्स, अज्झवसाणम्मि सोहणे। मोहं गयस्त संतस्स, जाईसरणं समुप्पन्नं ॥७॥ देवलोगचुओ संतो, माणुसं भवमागओ। सन्नि-नाणे-समुप्पन्ने, जाई सरइ पुराणियं ॥८॥ जाईसरणे समुप्पन्ने, मियापुत्ते महिड्ढिए । सरई पोराणियं जाई, सामण्णं च पुराकयं ॥९॥
Jain Education International
For Private & Personal Use Only
www.jainelibrary.org
| SR No. | 001954 |
| Book Title | Dhammakahanuogo |
| Original Sutra Author | N/A |
| Author | Kanhaiyalal Maharaj, Dalsukh Malvania |
| Publisher | Agam Anuyog Prakashan |
| Publication Year | |
| Total Pages | 810 |
| Language | Prakrit |
| Classification | Book_Devnagari, Agam, Canon, Story, Literature, & agam_related_other_literature |
| File Size | 20 MB |