Page Text
________________
मल्ली-चरियं
२३६ तए णं मल्ली अरहा जेणेव सहस्संबवणे उज्जाणे जेणेव असोग-वर-पायवे तेणेव उवागच्छइ, उवागच्छित्ता सीयाओ
पच्चोरुहइ, आभरणालंकार ओमयइ । तए णं पभावई हंस-लक्खणणं पडसाडएणं आभरणालंकारं पडिच्छइ । तए णं मल्ली अरहा सयमेव पंचमुट्ठियं लोयं करेइ । तए णं सक्के, देविदे, देवराया, मल्लिस्स केसे पडिच्छइ, पडिच्छित्ता खोरोदग-समुद्दे साहरइ । तए णं मल्लो अरहा 'नमोत्थु णं सिद्धाणं' ति कटु सामाइय-चरित्तं पडिवज्जइ । जं समयं च णं मल्ली अरहा सामाइय-चरितं पडिवज्जइ, तं समयं च णं देवाण माणुसाण य निग्रोसे, तुडिय-णिणाए, गीय-वाइय-निग्घोसे य सक्क-वयण-संदेसेणं निलुक्के यावि होत्था । जं समयं च णं मल्ली अरहा सामाइय-चारित्तं पडिवणे, तं समयं च मल्लिस्स अरहओ माणुस-धम्माओ
उत्तरिए मणपज्जव-णाणे समुप्पण्णे । २३७ मल्ली णं अरहा जे से हेमंताणं दोच्चे मासे, चउत्थे पक्खे, पोससुद्धे, तस्स णं पोससुद्धस्स एक्कारसीपक्षेणं, पुन्वण्हकाल
समयंसि, अट्टमेणं भत्तेणं अपाणएणं, अस्सिणीहि नक्खत्तेणं जोगमुवागएणं, तिहि इत्थीसहि-अभितरियाए परिसाए, तिहि पुरिससएहिं बाहिरियाए परिसाए सद्धि मुंडे भवित्ता पम्वइए । मल्लि अरहं इमे अट्ठ नायकुमारा अणुपव्वइंसु, तं जहा - गाहा-नंदे य नंदिमित्ते, सुमित्त-बलमित्त-भाणुमित्ते य । अमरवइ अमरसेणे, महसेणे चेव अट्ठमए ॥१॥ तए णं ते भवणवइ-वाणमंतर-जोइसिय-वेमाणिया देवा मल्लिस्स अरहओ निक्खमण-महिमं करेंति, करेत्ता जेणेव नंदीसरे बीवे, तेणेव उवागच्छंति, उवागच्छिसा अट्ठाहियं महिमं करेंति, करेत्ता जामेव दिसि पाउन्भूया, तामेव दिसि पडिगया ।
मल्लीए केवलणाणं २३८ तए णं मल्ली अरहा जं चेव दिवसं पव्वइए, तस्सेव दिवसस्स पच्चावरण्ह-काल-समयंसि, असोग-वर-पायवस्स अहे पुढवि
सिलापट्टयंसि सुहासण-वर-गयस्स सुहेणं परिणामेणं, पसत्याहिं लेसाहि, तयावरण-कम्मरय-विकरण-करं अपुटव-करणं अणुपविट्ठस्स अणंते, अणुसरे, निवाघाए, निरावरणे, कसिणे, पडिपुण्णे, केवल-वर-नाण-दंसणे समुप्पण्णे । तेणं कालेणं, तेणं समएणं, सव्वदेवाणं आसणाई चलेंति, समोसढा, धम्म सुणेति, सूणेत्ता जेणेव नंदीसरे दीवे, तेणेव उवागच्छंति, उवागच्छित्ता अट्टाहियं महिमं करेंति, करेत्ता जामेव दिसि पाउन्भूया, तामेव दिसि पडिगया । कुंभए वि निग्गच्छद।
जियसत्तुपामोक्खाणं पव्वज्जा २३९ तए णं ते जियसत्तु-पामोक्खा छप्पि रायाणो जेट्ट-पुत्ते रज्जे ठावेत्ता पुरिस-सहस्स-बाहिणीयाओ सीयाओ दुरूढा समाणा सव्वि
ड्ढीए जेणेव मल्ली अरहा तेणेव उवागच्छंति - जाव - पज्जुवासंति । तए णं मल्ली अरहा तीसे महइ-महालियाए परिसाए, कुंभगस्स रण्णो तेसिं च जियसत्तु-पामोक्खाणं छहं राईणं धम्म परिकहेइ । परिसा जामेव दिसि पाउन्भूया, तामेव दिसि पडिगया। कुंभए समणोवासए - जाव - पडिगए, पभावई य । तए णं जियसत्तु-पामोक्खा छप्पि रायाणो धम्मं सोच्चा निसम्म एवं वयासी'आलित्तए णं भंते ! लोए, पलित्तए णं भंते ! लोए, आलित्त-पलित्तए णं भंते ! लोए जराए, मरणेण य - जाव • पव्वइया - जाव - चोद्दसपुग्विणो । अणंते वर-नाण-दसणे केवले समुप्पाडेता तओ पच्छा सिद्धा ।
मल्लिजिणस्स सिस्स-संपदा २४० तए णं मल्ली अरहा सहस्संबवणाओ उज्जाणाओ निक्खमइ, निक्खमित्ता बहिया जणवय-विहारं विहरइ ।
मल्लिस्स णं अरहओ भिसग-पामोक्खा अट्ठावीसं गणा, अट्ठावीसं गणहरा होत्था । मल्लिस्स णं अरहओ चत्तालीसं समण-साहस्सीओ उक्कोसिया समण-संपया होत्या, बंधुमइ-पामोक्खाओ पणपन्नं अज्जियासाहस्सीओ उक्कोसिया अज्जियासंपया होत्या, सावयाणं एगा सय-साहस्सी चुलसीइं सहस्सा, सावियाणं तिण्णि सय-साहस्सीओ पट्टिं च सहस्सा, छस्सया चोद्दसपुवीणं, वीसं सया ओहिनाणीणं, बत्तीसं सया केवल-नाणीणं, पणतीसं सया वेउब्वियाणं अट्ठ-सया मणपज्जव-नाणीणं, चोद्दस-सया वाईणं, बीसं सया अणुत्तरोववाइयाणं ।
Jain Education International
For Private & Personal Use Only
www.jainelibrary.org
| SR No. | 001954 |
| Book Title | Dhammakahanuogo |
| Original Sutra Author | N/A |
| Author | Kanhaiyalal Maharaj, Dalsukh Malvania |
| Publisher | Agam Anuyog Prakashan |
| Publication Year | |
| Total Pages | 810 |
| Language | Prakrit |
| Classification | Book_Devnagari, Agam, Canon, Story, Literature, & agam_related_other_literature |
| File Size | 20 MB |