________________
कुमारपालप्रतिबोध-सङ्केपः ।
पृष्ठ १९.
पुन्नं व मुत्तिमंतं जसभद्द-निवस्स जं सहइ ।। रन्ना पुण पडिवन्ना सिरि-दत्त-गुरुस्स चलण-मूलम्मि । अंतर-रिउ-वह-दक्खा दिक्खा निसियाऽसि-धार व्व ॥ एगंतरोववासे जा जीवं अंबिलं च पारणए । काहं ति तेण विहिया वय-गहण-दिणे चिय पइन्ना ।। सुय-सागर-पारगओ सूरि-पयं पाविऊण जसभद्दो । भुवणे चिरं विहरिओ पडिबोहंतो भविय-वग्गं ॥ ससमय-परसमय-विऊ समए तेणावि निय पए ठविओ। निजिय-पज्जुन्न-भडो पज्जुन्नो नाम वर-सूरि ॥ अह जसभद्दो सूरी तिव्व-तवचरण-सोसिय-सरीरो । निय-परिवार-समेओ आरूढो उज्जयंत-गिरिं ॥ रेवयगिरिंद-मउडं व सुकय-लच्छी-विलास-कमलं व । भव-जलहि-जाणवत्तं व जिण-हरं गणहरो पत्तो ॥ नमिऊण नेमिनाहं पमजिउं निवसिऊण तस्स पुरो। पज्जुन्नसूरि-पमुहं निय-परिवारं भणइ एवं ।। राग-दोस-विमुक्को चिर-सेविय-नाण-दसण-चरित्तो । निच्छय-नएण तित्थं अप्प चिय वुच्चए जइ वि ॥ तह वि हु ववहार-नयेण जो पएसो पणट्ठ-पावाण । तित्थंकराण पएहिं फरिसिओ सो परं तित्थं ॥ इह दिक्खा-पडिवत्ती नाणुप्पत्ती विमुत्ति-संपत्ती । नेमिस्स जेण जाया तेणेसो तित्थमुजितो । अन्नत्थ वि मेल्लिस्सं निस्संदेहं दुहावहं देहं । तत्तो वरं पसत्थे तित्थे इत्थे वि मेल्लेमि॥ इय भणियं पञ्चक्खइ जिण-पञ्चक्खं चउबिहाहारं । वारंतस्स वि पञ्जुन्नसूरिणो सपरिवारस्स ॥ पउमासणोवविट्ठो परिचत्त-समत्त-गत्त-परिकम्मो । सिरि-नेमिनाह-पडिमा-मुहपंकय-निहिय-नयण-जुओ । सव्वत्थ वि राग-दोस-वजिओ परम-तत्त-लीण-मणो । मुणिपुंगव-मुणियागम-सवण-समुल्लसिय-संवेगो । पुव्व-महारिसि-मग्गो दूसम-समये वि सेविओ सम्म । तेरस-दिणावसाणे पत्तो तियसालयं सूरी ॥ तत्तो पज्जुन्नगुरू वियरंतो सयल-संघ-परिओस । सुत्तत्थ-पयडण-परो परोवयारं चिरं कुणइ ।
For Private & Personal Use Only
Jain Education International
www.jainelibrary.org
