________________
३२०
[ चतुः
कुमारपालप्रतिबोधे अंबो कुमार ! चविउं सोहम्माओ तुम समुप्पन्नो। जीव-वह-विरह-वसओ संपत्तो एरिसिं रिद्धिं ॥ नरगाओ निक्खंतो निंबो धावी-सुओ इमो जाओ। जीव-वह-विहिय-पावस्स सेसमणुभुंजइ वराओ । पुव्व-भवन्भासेणं उवयारिच्छा इमम्मि तुह फुरइ। किंतु पुराकय-दुक्य-वसेण थेवोवि नत्थि गुणो ॥ संजाय-जाइसरणो भयवं ! सचं इमं ति भणइ सिवो । संविग्ग-मणा दुन्निवि नमिऊण गुरुं गया गेहं॥ भणिओ सिवेण राया वय-गहणत्थं ममं विसजेसु। रन्ना वुत्तं किचं जमम्ह तं वच्छ ! कुणसि तुमं ॥ पियरो दुप्पडियार त्ति पुत्त ! जइ मुणसि वुड्ड-वयणमिणं । ता घेत्तुं रज्जमिमं धम्म-सहाओ हवसु मज्झ ॥ कुमरो जंपइ जं ताय ! आणवसि तत्थ एस सज्ज़ोम्हि । तत्तो रजम्मि सिवं ठविउं गिण्हइ निवो दिक्खं ॥ पडिवन्न-गिहत्थ-वओ दया-पहाणो सिवो कुणइ रजं । सो पडह-दाण-पुरुवं समत्त-जीवाभयं देइ ॥ सव्वत्थ गरिम-जिय-मंदराई जिणमंदिराई कारवइ । गुण-गाम-गामणीणं मुणीण चलणे नमइ निचं ॥ सव्वे वि निवा सेवं पयावमेत्तेण तस्स पडिवन्ना । तत्तो समर-निमित्तो न तस्स रजम्मि जीव-वहो । चोरस्सवि नत्थि वहो जं कोवि न तत्थ चोरियं कुणह। इय निरवजं रज्जं परिपालइ सिव-महीनाहो ॥ दभग्ग-लग्ग-जल-बिन्दु-चंचलं जीवियं वियागंतो। पुत्तं रज्जे ठविउं कयावि दिक्खं पवन्नो सो॥ रक्खिय-असेस-जीवो समत्त-सुत्तत्थ-पारगो जाओ। कय-तिव्व-तवो मरि पत्तो तिदिवं सिवं च सिवो ॥
इति स्थूलप्राणातिपातविरतौ सिवकुमारकथा ॥
Jain Education International
For Private & Personal Use Only
www.jainelibrary.org
