________________
३१८
[चतुर्थः
कुमारपालप्रतिबोधे जेणेस अप्पणो भूमिगोयरस्स य वियाणइ विसेसं । तह सेस-खेयरेहिं खरंटिओ निग्गओ दूओ॥ गंतूण सूरतेयस्स तं कहइ सोवि कोव-दुप्पेच्छो । बहु-खयर-सुहड- सहिओ कणयपुरं झत्ति संपत्तो ॥ तस्सागमणं मुणि कुमरो पवणंजयं भगइ एवं । इमिणा सह जुज्झंतं मं पिच्छ तुमं सपरिवारो॥ तो पवणंजय-सहिओ सिवकुमरो निग्गओ रहारूढो । वजरइ सूरतेयं पट्टविउं खेयरं दूयं ॥ तुह मम य विग्गहो एस सेस-लोयस्स किं विणासेण । एकंगा जुज्झामो दुन्नि वि पेच्छउ जणो सेसो॥ दप्पेण सूरतेओ तं पडिवजइ तओ इमे दोवि । रहमारूढा समरं कुणं ति मिलंति सर-नियरं ॥ तो सूरतेय-बाणा तरुणि-कडक्ख व्व वीयरायम्मि । सव्वेवि निष्फलत्तं पडिवन्ना सिवकुमारम्मि ॥ सिवकुमर-सर-समूहो अड-पहे सूरतेय-सर-पंतिं । निप्पुन्न-जण-मणोरह-मालं छिंदेइ देवो व्व ।। तो निट्टिय-सर-निचओ चावं चइऊण गहिय-करवालो। दुक्के सूरतेओ कुमरो विहु गिण्हए खग्गं । निय-खग्गेणं खग्गं पोरिस-दप्पं च खंडए तस्स। वेत्तूण सूरतेओ छुरियं पहरेइ सिवकुमरं ॥ लग्गइ न सो पहारो देहे थेवं पि सिवकुमारस्स। चित्तम्मि सजणस्स व दुजण-दुव्वयण-संघाओ॥ कुमरेण वज-कढिणेण मुट्ठिणा पहणिऊण तस्स भूयं । छुरिया निवाडिया करयलाउ सो पाडिउं बद्धो ॥ गयणाउ कुसुम वुट्टी मुक्का कुमरस्स उवरि अमरेहिं । सव्वो वि विम्हिओ विक्कमेण कुमरस्स खयर-गणो॥ कुमरेण सूरतेओ मुक्को काऊण गरुय-सक्कारं ।। रयणावलि त्ति भइणी तेणवि परिणाविओ कुमरो॥ इय अन्नेहिं वि विजाहरेहिं दिन्नाउ तस्स कन्नाओ। तह तेण साहियाओ पन्नत्ति-प्पमुह-विजाओ।
Jain Education International
For Private & Personal Use Only
www.jainelibrary.org
