Page Text
________________
प्रस्तावः] तपसि रुक्मिणी-कथा ।
२५५ जाया कुरूवा विस्सरा दुग्गंधा काणि त्ति नाम धीवर-धूया। तग्गंधं असहंतेहिं पिउहिं नम्मया-तीरे तण कुडीरयं काऊण तत्थ ठविया सा। नावाए नईए लोगं उत्तारंती दिणाइं गमेइ । अन्नया सो चेव समाहिगुत्तो साहू सिसिरे नम्मया तीरे कय-काउस्सग्गो दिट्ठो तीए । तं च तरंगिणी-तरंग-संग-सीयलं दुस्सह-समीरं सहतं संझाए निरावरणं पेच्छिऊण जाय-करुणाए कया तस्स समंतओ तण-भरेहिं पवण-वारणत्थं वाडी । पभाए आगया, मुणिं नमिऊण निविट्ठा पुरओ । कया मुणिणा धम्मदेसणा । तं सोऊण संविग्गा सा पुच्छए मुणिं-भयवं ! कहिं पि तुमं मे दिट्ठ-पुवो। नाण-बलेण साहिया साहुणा तीए लच्छिमइ-भवाइया पुव्व-भवा । संजाय-जाइसरणा जाया सा साविया । साहुणा समप्पिया धम्मसिरि-अजाए। साहुणीहिं सह विहरंती गया गाममेकं । मुक्का तत्थ नाइल-सावयस्स गिहे। करेइ जिण-भव-वेयावच्चं । काऊण बारस-वरिसाइं एगंतरोववासे पजंत-विहियाणसणा मरिऊण जाया अच्चुइंदस्स पिययमा। पंचपन्नासं पलिओवमाइं पवर-भोगे भुत्तण समुप्पन्ना इहेव भरहे वराड-विसय-मंडिणीए कुंडिणीए नयरीए ।
जत्थुल्लासिय-दोसायराउ रयणीउ न 'उण रमणाओ। __ अगुरु-परिचय-पहाणा य भोइणो जोइणो न जण ॥ तत्थ वसुहा-विलासिणी-विसेसओ भेसओ राया।
जस्स असि-भिन्न-अरि-करि-कुंभत्थल-गलिय-नुत्तिय-गणेण । बीएण व जणिया समर-भूमि-पडिएण कित्ति-लया ॥
तस्स रन्नो निरुवम-रूव-रेहा-वियंभिय-जसाप जसमइ-देवीए गम्भ संभवा रुप्पिकुमारस्स लहु-बहिणी सप्पिणी नाम धूया जाया। सा य सरीरसुंदरिम-दलिय-देव-रमणी-मडप्फरा मयरद्धय-महाराय-लीला-वणं पत्ता जुव्वणं । इओ य विस्संभर-भरण-भूयाए बारवइए भरहद्ध-चक्कवट्टी कण्हो राया । अन्नया तत्थ गओ गयणंगणेण नारय-रिसी। सो वि कण्ह-बल-पमुह-दसारे अभिनंदिऊण पत्तो कण्हस्स अंतेऊरं। तत्थ अन्मुट्ठाण-अग्ध-दाणाईहिं सम्माणिओ अंतेउरीहिं, न उण कयसिंगाराए आयरिस-गिहे अप्पाणं सच्चवंतीए सच्चभामाए । कुविएण तेण चिंतियं-निय-सोहग्ग-गवियाए सचभामाए एकाए न पूडओऽहं ता तहा करेमि जहा एसा सावन-दुक्खे पडइ त्ति । तओ उप्पइओ सो निसियासि-पट्ट-सन्निहं नहंगणं । पत्तो कुंडिणीए । भेसय-नरिंद्मभिनंदिऊण पविट्ठो अंतेउरं दिट्ठा तत्थ रुपिणी ।
Jain Education International
For Private & Personal Use Only
www.jainelibrary.org
| SR No. | 001873 |
| Book Title | Kumarpal Pratibodh |
| Original Sutra Author | Somprabhacharya |
| Author | Jinvijay |
| Publisher | Central Library |
| Publication Year | 1920 |
| Total Pages | 564 |
| Language | Prakrit |
| Classification | Book_Devnagari, Story, & Literature |
| File Size | 11 MB |