________________
कुमारपालप्रतिबोधे
[प्रथमः एवं अभिग्गहं सो गहिऊण नियत्तिउं गओ रन्नं । तण-कट्टहार-वणछिंद-दिन्न-भिक्खाइ पारेइ ॥ सज्झायं धम्मकहं च तस्स सोऊण उवसमं पत्ता । करि-वग्घ-सीह-चित्तय-संवर-हरिणाइणो सत्ता ॥ ते के वि सावगत्तं सम्मत्तं के वि के वि अविरोहं । के वि हु भग-भावं पडिवन्ना अणसणं के वि॥ पडिमाठियं निसन्नं च तं निसेवंति मुक्क-वावारा। जम्हा असंभवं पि हु तव-प्पभावेण संभवइ ॥ तत्थेको हरिण-जुवा संविग्गो पुव्व-कम्म-संबद्धो । सव्वत्थ राममुणिणोऽणुमग्ग-लग्गो परिब्भमइ ॥ अह पत्ता रहकारा रुक्खे छिदंति तत्थ दारुकए। भोयण-समए तेसिं भिक्खत्थं आगओ रामो॥ सुक्क-तण-पत्त-भोई तत्थ गओ साहुणा समं हरिणो । दट्टण मुणिं रहकार-सामिणा चिंतियं एवं ॥ रोरघरे एस निही एसो मरु-मंडलंमि कप्प-तरू । जं पत्तो इत्थ इमो मुणी अहो ! मज्झ पुन्नाई॥ पुन्ना मणोरहा मे मह सहलं जीवियं कयत्थोऽहं । दाउं इमस्स भिक्खं करेमि गय-पावमप्पाणं ॥ तो नमिऊण महीयल-निहिय-सिरो देइ सो पवर-भिक्खं । सा गहिया मुणिणा दायगेण देवाउयं बद्धं ॥ हरिणो वियसिय-नयणो रामरिसिं दायगं च रहकारं । पुणरुत्तं पिच्छंतो संविग्गो चिंतए एवं ॥ धन्नो इमो कयत्थो जो पडिलाभइ महामुणिं एवं । पुन्न-रहिओ अहं पुण अखमो दाणंमि तिरिओ त्ति ॥ इय दायगं पसंसइ पुणो पुणो निंदए य अप्पाणं । इत्थंतरंमि पबलानिलेण कंपाविओ पडिओ॥ अद्धच्छिन्नो रुक्खो उवरिं रहकार-साहु-हरिणाण । तिन्नि वि मरित्रं देवा उपन्ना पंचमे कप्पे ॥ बलदेवो वरिससयं सामन्नं पालिउं सुरो जाओ। आरुग्ग-सुक्ख-बल-रूव-संपयाहिं पहाणयरो॥
Jain Education International
For Private & Personal Use Only
www.jainelibrary.org
