________________
प्रस्तावः]
वेश्याव्यसनविषये अशोककथा। विहलो चिय संजाओ इमीए मुसिओम्हि जं एवं ॥ सो परिवार-विमुक्को कत्थ वि केणावि अकय-सम्माणो । तत्थेव ठिओ लज्जाइ निय-पुरगंतुमतरंतो ॥ तस्स सरुवं मुणिउं पुरिसो भद्दिलपुरं गओ एको । सो सुंदरस्स साहइ तं सोउं दुमिओ एसो॥ भणिया अणेण चंडा-मह पुत्तो किं पढाविओ तुमए । जं सो सयलं पि धणं गणियाए गयउरे गहिओ॥ तो कुहिणीइ भणियं-खेयं मा कुणसु सह मए चलसु । गंतूण गयउरे जेण तुज्झ अप्पेमि पुत्त-धणं ॥ सह सुंदरेण चंडा संपत्ता तत्थ पेच्छइ असोगं । तेण सह मंतिउं किं पि कुणइ डुंबीइ वेसमिमा ॥ आढवह गाइडं विहिय-डुंबवेसेण सुंदरेण समं । कामलयाए गेहस्स अग्गओ मणहरं गेयं ॥ तं निसुणइ एकमणा कामलया जाव ताव संपत्तो। सहस त्ति असोगो लग्गिऊण दुण्हवि गले रुयइ ॥ दोवि इमाई रूयंताई तं पयंपंति-वच्छ ! ते लच्छी। कत्थ गया जं दीससि तुमं किसो मलिण-वत्थो य॥ तेणंगुलीइ तेसिं कामलयं दंसिउं भणियमेयं । एईए वेसाए गहिया में वंचिउं लच्छी॥ तं दट्टे कामलया भीया चिंतइ-असोहणं जायं । जं धणलुद्धाइ मए विहिओ डंबेण संबंधो॥ ताई भणियाई तीए वुत्तं तमिणं परस्स मा कहह । तेहिं भणियं समप्पसि जइ अम्ह धणं समग्गं पि॥ ता न कहेमो अन्नस्स कस्सई अन्नहा कहिस्सामो । तीए भीयाइ धणं सव्वं पि समप्पियं ताण ॥ तो कुहिणी-समेओ पुत्तं वित्तं च गिहिउँ झत्ति। . भद्दलपुरंमि नयरे संपत्तो सुंदरो सेट्ठी ॥ वेसाओ रक्खसीओ व तओ असोगो परिचयइ निच्चं । जम्हा न होइ पुरिसो अखंडिओ पंडिओ कहवि ॥
Jain Education International
For Private & Personal Use Only
www.jainelibrary.org
