Page Text
________________
द्यूतविषये नलचरितम् ।
दिट्ठि - प्याण-मत्तेण पडिहयाणप्प-दष्प-माहप्पा | रक्खस-भूय-प्पमुहा परंमुहा जंति दूरेण ॥
1
अह पह- परिस्सम-सलिल - धोय- गत्ताए कंटयाइ - विड-पाय-तल-झरंतरुहिराए धूलि - धूसर - सरीर-च्छवीए तीए दिट्ठो महंतो सत्थो । चिंतियं च - अहो ! अरन्न- नित्थरण-कारणं दिट्ठो मए पुन्नोदएण पसत्थो सत्थो । सत्थी-हुआ किंचि जाव ताव सव्वओ विविहाउह - भयंकरेहिं तक्करेहिं रुडो सत्थो । संतत्था तत्थ लोया । तीए भणिया मा बीहेह त्ति हक्किया तक्करा- अरे दुरायारा ! मए रक्खिजंतं मालूह सत्थं, अन्ना पाविस्सह अणत्थं । तहवि न विरमंति चोरा । तओ तीए सील-प्पभाव-दुस्सहा विमुक्का हुंकारा । तेहिं धणु-गुण- टंकारेहिं वायस व्व पणट्ठा चोरा । सत्थ-लोएण भणियं - अम्ह पुन्नाओ ठिया कावि देवया एसा । जीए चोरेहिंतो रक्खिओ सत्थो । सत्थ- वाहो जणणिं व तं पणमिऊण पुच्छएदेवि ! काऽसि तुमं ?, किं वा अरने परिब्भमसि ? । कहिओ तीए रुयतीए तस्स बंधवस्सेव सव्वो निय-वुत्ततो । तेण वृत्तं - महा - राय - नलस्स पत्ति त्ति मे पूणिज्जासि । तुमए तक्करेहिंतो रक्खंतीए उवयार - क्किणिओऽहं । ता पवितेहि ममावासं ति भणिऊण दमयंती नीया नीयावासं । तं देवयं व आराहए सत्थ- वाहो | एत्थंतरे गरुय - गज्जि - भरिय-बंभंड-भंडो आखंडल - कोयंड-दंडो सिहंडि-मंडलाबद्ध - तंडवो घण-पडल-पडच्छन्न- नह- मंडवो निरंतरासार - सीयलो सलिल - प्पवाह- मंडिय-मही- यलो पयट्टो पाउसो । जाया ति-रत्तं निरंतरा बुट्ठी । सुहं ठिया तत्थ दमयंती । विरयाए बुट्ठीए मुत्तूण सत्थं पत्थिया एसा । पिच्छए पिंग-केसं गिरिं व दावानल - पलित्तं जलयं व काल-कार्यं कयंतं व कयदुइय-रूवं कत्तिया - कराल - करं घणं व विज्जु-च्छडाडोव-भीसणं रक्खतं । भणियं अणेण - सत्त-रत्त - छुहियस्स में भक्खमुवलद्धियं ता तुमं भक्खिस्सं । तीए भणियं - भद्द ! जायस्स जंतुणो धुवो मच्चू । अकयत्थस्स मच्चु-भयं । अहं पुण मूलाओ देव-गुरु- भत्तीए कयत्था । नत्थि मे मच्चु भयं । किं चविविह- दुह - दूमिआहं मरणं पत्थेमि दुक्ख - मोक्ख कए । नल- विरहानल-दड्डुं च मं तुमं खाहिसि सुहेण ॥
ता भक्ख किं विलंबसि ? एस मए तुज्झ अपिओ अप्पा | मरणं विणा दुहाणं जलंजली जायए कत्तो ? ॥
तओ धीरयाए तुट्ठो रक्खसो । भणियं तेण-भद्दे ! तुट्ठो म्हि । किं ते पियं करेमि ? । ती वृत्तं - जइ तुट्ठो सि ता कहेसु कया मे पह-संगमो होहि
।
Jain Education International
५९
For Private & Personal Use Only
www.jainelibrary.org
| SR No. | 001873 |
| Book Title | Kumarpal Pratibodh |
| Original Sutra Author | Somprabhacharya |
| Author | Jinvijay |
| Publisher | Central Library |
| Publication Year | 1920 |
| Total Pages | 564 |
| Language | Prakrit |
| Classification | Book_Devnagari, Story, & Literature |
| File Size | 11 MB |