Page Text
________________
११८
जुगाइजिणिद-चरियं
तं मूलागमेव संजायचरणपरिणामा विसमिव विसयगणं मन्नंता, सव्वाणत्थनिबंधणं धणं गणिता, पासं व घरवासं पासंता, कारागारं व संसारं सरंता, आपुच्छिऊण जणणि जणए संतू सिऊण सुहिसयणवग्गं, संठविऊण संबंधिजणं, काऊ जिणायणे अट्ठाहिया महिमं संपूइऊण सिरिसमणसंघ, दाऊण दीणाईण महादाणं निव्वत्तियासेस कायव्वा, अणुगम्ममाणा पहाणपरियणेण, पुरिससहस्सवाहिणीसु सिबियासु समारूढा, थुव्वंता मुहल-मागहजणेण, आनंदिज्जमाणा नगरलोएण, महया रिद्धीए गया सहयारसुंदरं नाम उज्जाणं । निन्नामिया जीवेण अभयघोसेण सह पब्वइया । तहाविहाणं राणं अंतिए गहिया दुविहा सिक्खा । जहारिहमहिज्जियसुत्तत्था, विष्णाय साहुकिरिया-कलावा, अवगयबहुकिलेसायास संसार-पवंचा, अइदुक्कर- तव चरण- परिसोसियंगा, दव्व- खित्त-काल- भावेसु अप्पडिबद्ध माणसा, परिपालियनिरइयारसामण्णा, विहिविहियपज्जत्ताण मणा, समाहि-मरणेण मरिऊण अच्चुयं गया । तत्थ भोत्तूण सुरसोक्खं ठिइखएण चुया समाणा इहेव जंबद्दीवे द्दीवे पुब्वविदेहे पुक्खलावइ - विजए पुंडरिगिणीनयरीए वइरसेणरण्णो धारिणीए देवीए कुच्छिसि पढमो वइरनाभो नाम पुत्तो जाओ । जो सो विज्जपुत्तो सो चक्कवट्टी जाओ । अवसेसा कमेण बाहु - सुबाहु - पीढमहापीढ ति । वइरसेणो पढमं पव्वइओ तित्थयरो जाओ । इयरे वि संवड्ढिया पंचलक्खणे भोए भुंजंति । जो सो निन्नामिया जीवो अभयघोसो सो वि तीए चेव नयरीए सुजसो नाम रायपुत्तो जाओ । बालभावे चेव वइरनाहं समल्लीणो । जद्दिवसं वइरसेणस्स केवलनाणं समुप्पण्णं तद्दिवसं वइरनाहस्स वि आउह- सालाए चक्करयणं समुप्पण्णं । वइरनाहो चक्कवट्टी जाओ । सुजसो तस्सेव सारही । तेण साहु-वेयावच्चेण चक्कवट्टिभोगा उइण्णा । अवसेसा चत्तारि वि मंडलिया रायाणो । तत्थ वइरनाह चक्कवट्टिस्स चउरासीपुव्वलक्खा सव्वाज्यं । तत्थ कुमारो तीसं । मंडलिओ सोलस । चउवीसं महाराया । चोइससामण्णपरियाओ । एवं चउरासी सव्वाउयं भोए भुजंता विहरति । इतो य तित्थयरवयरसेस्स समोसरणं, सो पिउपायमूले चउहिं वि सहोयरेहिं सुजसेग य सारहिणा समं पव्वतो । तत्थ वइरनाभेण चोद्दसपुब्वा अहिज्जिया । सेसा एक्कारसंगधारिणो जाया । तत्थ बाहू सुसाहूणं असणाइणा वेयावच्च करेइ । जो सुबाहु सो साहुणो वोसामेइ । एवं ते करेंते वइरनाहो भगवं उबवूहेइ - - " अहो सुलद्धं जम्मजीवियफलं जं साहूण वेयावच्चं कीरइ । परिस्संते तवा साहुणो' वीसामिज्जति । जओ-
परिभग्गस्स वयस्स व नासइ चरणं सुयं अगुणणाए । न हु वेयावच्चवियं सुहोदयं नासए कम्मं ।। १०७२।।
एवं पसंसंति, एवं पसंसिज्जमाणेसु तेसु तेसि दोन्हं पि पच्छिमाणं अपत्तियं हवइ । 'अम्हे सज्झायंता न पसंसिज्जामो, जो करेइ सो पसंसिज्जइ । सच्चो लोगववहारो त्ति वइरनाहेण विसुद्धपरिणामेण इमेहि ठाणेहि तित्थयरनामगुत्तं कम्मं बद्धं । तं जहा - अरहंताण वच्छल्लकरणेण तं पुण जहावट्टियगुणकित्तणं पुप्फाइणा पूओवयारकरणं च तित्थयरनामगोतं कम्मं निबंधणं १ । सिद्धाणं पुण वच्छल्लं असंसकम्मविष्पमुक्काणं परमपयपइट्ठियाणं सद्दाइगुणविरहियाणं अणंतनाण-दंसण-सुह-वीरियविराईयाणं अरूवाणं बहुमाणपव्वं सद्दहणं २ । पवयणं संघो । ३ गुरू धम्मोवएस दायारो ४ । धम्मे थिरी करेइ जो सो थेरो ५ । बहुस्सुओ पुण बहुआगमो ६ । तवस्सी छट्ठमाइकारगो ७। एएसि वच्छल्लया अवभत्तिबहुमाणेण जं जस्स उचियं तं तस्स करेइ । अभिक्खणं नाणोवओगो नाम सुत्तत्थेसु उवउत्तया ८ । दंसणं सम्मत्तं ९ । विणओ विणयारिहाणं अरिहंत - सिद्ध-आयरियाईण जं जस्स उचियं तं तस्स तहेव करणं १० । आवस्सयं नाम अवस्सं करणिज्जं पडिक्कमणाइ ११ । सीलं अट्ठारससीलंगसहस्साणि उत्तरगुणा वा १२ । एएसु निरइयारया पडिपुण्णपालणया वयाणि मूलगुणा एएसु निरइयारत्तणं पडिपुण्णपालत्तणमेव १३ । खणलव १४ । तवच्चियाए १५ । वेयावच्चे १७ । एएसु समाहीए तत्थ खणलवसमाही नाम खणलवमित्तमविकालं नो असमाहीए भवइ । यदुक्तं -
‘“संजमरइ-बहुले एवं तवरइबहुले चियाग - रइबहुले" । चियाओ दुविहो- दव्वचियाओ भावचियाओ । तत्थ दव्वचियाओ आहार- उवहि- सेज्जाईणं अप्पाउगाणं विवेगो । पाउगाणं दाणं । भावचियाओ कोहाईणं । विवेगो नाणाईणं । १. एरिसं तवो सा० जे० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |