Page Text
________________
सुरूवपडिरूवकहा
तम्मि य गरे णियबंध कुमयसंडणिसायरो अपिसूणो अमच्छरी कयण्णुओ पढमाभिभासी सोमदेवो नाम माहणो परिवसइ । विणिज्जियरतिरूवावीयमिव अभग्ग-सोहग्ग-महामहीरुहस्स, सुखेत्तमिव रूवाइगण-गणसस्साणं, रायहाणी विव मयर-केउणो' सयलसंसार-सुहणिबंधणा सोमा नाम माहणी । तीए सह विसय-सुहमणुभवंतस्स सोमदेवस्स सुरूवपडिरूवाभिहाणा' जाया दोन्नि दारया । कमेण वढमाणा पत्ता जोव्वणं । परिणीया तम्मि चेव नगरे सकम्म-णिरयाण माहण-कण्णगाण वच्चइ कालो । अण्णया कुसउरनयराओ अणुनविय गुरूयणं गामाणुगामं विहरंतो सुत्तत्थ-परिकम्मियमती सयलपावदाणाइं परिहरंतो समागतो तत्थ विजयधम्मो नाम मुणिवरो। ठिओ सोमसटिजाणसालाए। समागया णागरया कया मुणिणा धम्मदेसणा । वंदिऊण मुणिवरं जहागयं पडिगया परिसा । कओ तत्थेव मणिणा मासकप्पो । आगच्छंति पइदिणं सुरूव-पडिरूवगा माहण-दारया। मुणी वि कहेंति ताण जिणधम्म । अणुदिणं धम्मसवण-संजायसद्धेहिं गहिया मणिसमीवे णिरवराहबेइंदियाइजीवाण संकप्पओ पाणवह-णि वित्ती । मासावसाणे विहरिओ' अण्णत्थ मुणिवरो। जहा पडिवण्णाणुव्वय-पालणं कुणंताण वच्चइ कालो सुरूव-पडिरूवगाण ।
अण्णया मरणपज्जवसाणयाए जीवलोगस्स उवरयाणि जणणि-जणयाणि । ततो ते काऊण ताण मय-किच्चाणि घर-कज्जाणि काउमारद्धा । पुवकयकम्म-परिणइवसेण थोवदिणमझे चेव समागयं दालिदं । अणिव्वहंता य गया गाममेगं । परघरेसु कुकम्माणि कुणंता किलेसेण उदरमेत्तं पि भरेंति । अण्णया धण्णाभिहाणाए-रंडाथेरीए विस्सासमागयाए भणिया सुरूव-पडिरूवगा--"वच्छा ! नेह में कुसत्थलपुरं । तत्थ गया दीणार-दसगं वितरिस्सामि । पडिवण्णमणेहिं । कया गमण-सामग्गी सारहिभावं पडिवण्णो सुरूवो । गहियाउहो पुरतो ठितो पडिरूवगो । कमेण वच्चंता महाडवि पविट्ठा विगलियप्पाओ वासरो साम-वयणाओ कथावराहाओ विव कुलवधूओ जायातो दिसातो । एयम्मि अंतरे भग्गो अक्खो, भंडीए समारणकए तदुवगरणं परामुसंतेण दिट्ठो गंठी पडिरूवगेण । थेरीदिट्ठी वंचिऊण छोडिओ । दिट्टाओ दोण्णि सुवण्णखोडियाओं चलियचित्तेण सवणंते होऊण सणियं भणिओ सुरूवो पडिरूवगेण-"भाय! णिम्माणसा अडवी, तमंधयारा सव्वरी । अत्थि एयाए थेरीए सुवण्णयं । ता मारेऊण गिण्हामो ।" सुरूवेण भणियं--"अलमियाए पाव-कहाए । एगं वय-खंडणं, बीयं इत्थी-वहो, तइयं विस्संभघायगत्तणं । मूढो तुम जो सयमेव णिरवराह-बेइंदियाइजीवाणं संकप्पओ वहणिवत्ति काऊण भंजेसि ? अहो ते दढधम्मया! “पडिरूवगेण भणियं--"भाय ! मोत्तूण एवं वय-पालणा कूडाभिमाणं, करेसु मह वयणं ।" सुरूवेण भणियं--"जइ एवं मंतेसि तो हं तुह समीवे वि न चिट्ठिस्सं ।" इयरेण भणियं-"हियाहियवियार-बाहिरो कुग्गहमहागह-गहिय-माणसो दूरट्ठिओ चेव तुमं सुंदरो ।" ततो मोत्तूण तं पएसं दूरंगओ सुरूवो । इयरो वि थेरि मारिऊण गहियहिरण्णो अडवीए अलद्धलक्खं पलायंतो पंचाणणेण पंचत्तं पावितो । अट्टज्झाणेण मरिऊण समुप्पण्णो तम्मि चेव पएसे भुयंगमो । दट्ठण सुवण्णयं संजायमुच्छो तम्मि चेव पएसे अहिट्ठिय ठिओ। थेरी जीवो वि तेण तहामारिओ, नउलो जाओ । तेण वि परिभमंतेण दिळं तं सुवण्णगं । सो वि संजायमुच्छो तस्स परिपेरंतेसु परियडतो चिट्ठइ । दिट्ठो भुयंगमेण । पारद्धा जुज्झियं मारिओ णउलेण भुयंगमो । पुणो वि मरिऊण सप्पो जाओ । पुणो वि लोभदोसेण सुवण्णयमभिसरंतो णउलेण मारिओ संतो मूसगो जाओ । णउलो वि अहाऊयक्खएण मरिऊण तम्मि चेव ठाणे मज्जारो जाओ । तओ सो मूसगो सुवण्णगासण्णं परियडतो वावाइओ मज्जारेण । पुणो वि मूसगो जाओ । तत्थ वि वावाइओ, ततो मसगो मरिऊण तम्मि चेव पएसो मिगो जाओ। मज्जारो वि चित्तगो । चित्तगेण वि दो वारे वावाइतो मिगो संतो । मिगो मरिऊण जाओ कोलिय-सुओ । चित्तगो वि वाह-वहिओ मरिऊण तस्सेव लह-भाया। परोप्परं कलहंता कालं गमेंति । अण्णया दो वि गया अडवीए। भमंतेहिं दिळें तं चेव सुवणयं । पारद्धा जुज्झिउं । मारिओ कणिद्वैण जिट्ठो जाओ सूयरो । एमाइ थेरीए जीवातो पडिरूवगो दसगणं मरणं पावितो । जओ--- १. मयणके. पाल। २. पडिरूवसरूवगाभि० पा०। ३. विहरतो अण्ण. जे० । ४. कुकम्मकम्माणि पा० । ५. सोवण्णा खुट्रियातो जे० । ६. स्सेव भाया पा० । ७. तं पारद्धा जे० । ८. जिट्ठो एवमा० जे० । ९. मारणं पा० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |