Page Text
________________
सावधम्मवण्णणं.
पंच य अणव्वयाई गणव्वयाइंच होति तिण्णेव । सिक्खावयाई चउरो सावगधम्मो दुवालसहा ॥७२२।। थलगपाणवहस्सा विरती दुविहो य सो वहो होति । अवराहवज्जियाणं जियाण तह सावराहाणं ।।७२३।। मोत्तण सावराहे णिरावराहाण जो वहो होइ । संकप्पारंभेहिं दुविहो भणिओ जिणवरेहिं ॥७२४।। बेइंदियमाईणं निरावराहाण सयलजीवाणं । हड्डाइ कए वहणं संकप्पेणं वि वज्जेज्जा ।।७१५।। गुरुमले गहिऊणं थूलग-पाणिवहविरमणं सड्ढो । पइदियहमणुसरंतो वज्जेज्ज इमे य अइयारे ।।७२६।। बंध-वहं छविच्छेयं अइभारं भत्त-पाणवोच्छेयं । कोहाइदूसियमणो गो-मणूयाईणं न विहिज्जा ।।७२७।। जल-दारुय-धण्णाणं जयणाए करेज्ज संगहं सड्ढो । गहियाण वि परिभोगो विहीए तस्स रक्खणट्टाए ।।७२८।। थूलमसावायस्स य विरई बीयं अणुव्वयं भणियं । कण्णालियाइ भेया तं पंचविहं मुणेयव्वं ॥७२९।। जं जार-चोर-डाइणि निहाणलाभाइगोयरं अलियं । अइ तिव्वरागदोसेहिं तं पि वज्जेज्ज धम्मट्ठी ।।७३०।। पडिवण्णवएणेवं अणुसरमाणेण पइदिणं चेव । पंचइयारा एए परिहरियव्वा पयत्तेण ॥७३२।। अब्भक्खाणं सहस्सा रहसं च सदारमंतभेयं च । मोसोवएसदाणं कुडं लेहं च वज्जेज्जा ॥७३२।। बुद्धीए पेहिऊणं पुव्वं भासिज्ज उभयभवसुहयं । अप्पपराणं दोण्ह वि न सव्वहा पीडजणगं जं ।।७३३।। थूलादत्तादाणे विरई तच्चं अणुव्वयं णेयं । सच्चित्तेयरमिस्सं गो-रयण-विभसियनरं वा ।।७३४।। जे गिण्हतो सड्ढो चोरं कारं लभिज्ज लोगम्मि । तं परिहरिज्ज पयतो जाओ गुणड्ढो स अण्णेहिं ॥७३५।। पडिवज्जिऊण मतिमं जा जीवं इत्तरं च वयमेयं । अणुसरमाणो निच्चं वज्जेज्ज इमे य अइयारे ।।७३६।। तेनाहडप्पओगं तक्करजोगं विरुद्धरज्जं च । कूडतुल-कूडमाणं तप्पडिरूवं च ववहारं ।।७३७।। परदारपरिच्चाओ सदारसंतोसमावि य चउत्थो । परदारं पुण दुविहं ओरालवेउब्वियं तह य ॥७३८।। वयभंग-भीरूएणं वयविसयं पइदिणं सरंतेण । अइयारा सड्ढेणं परिहरियव्वा इमे पंच ॥७३९।। इत्तरियपरिग्गहिया अगहियगमणं चणंगकीडं च । वज्जेज्ज परविवाहं कामे तिव्वाभिलासं च ।।७४०।। सयलाणत्थपरंपरमूलमिणं वइकारणं परमं । भवविडवि-बीयभूयं णिबंधणं राग-दोसाणं ॥७४१।। वज्जेज्जा मोहकरं परजुवईदसणाइसवियारं । एए मयणबाणा चरित्तपाणे विणासेंति ॥७४२।।
सच्चित्ताचित्ताणं तुरयसुवण्णाइयाण-वत्थूण । परिमाणकरणमेयं पंचमगमणुव्वयं भणियं ॥७४३।। - तं पूण पंचइयारं खित्ताईयं हिरणमाईयं । धन्नाइदुपयाई विन्नेयं कुवियविसयं तु ।।७४४।।
गरुमले उवउत्तो गहिऊण तमित्तरं च इयरं वा । पालिज्ज विसुद्धमणो अणुसरमाणो य पइदियहं ।।७४५।। वयपडिवण्णेण इमे अइयारा जाणिऊण गुरुपुरओ । वयभंगभीरुएणं परिहरियव्वा पयत्तेण ॥७४६।। खेत्ताइहिरण्णाई धणाइ-दुपयाइ-कुविय-परिमाणे । सद्धा संसुद्धमणो ण पमाणाइक्कम कुणति ॥७४७।। संतोसामयतित्तो चिठेज्ज मया विथोवमिह मक्कं । विमणो चितिज्जमणे न य गिहिस्सं पूणो एवं ॥७४८।। पंच वि अणुव्वयाइं संखेवेणं सहाइयाराई । भणियाइ अओ वोच्छं लेसेण गुणव्वए तिणि ॥७४९।। उड्ढं, अहो, तिरिच्छं तिभेयभिन्नं दिसासु परिमाणं । पढमं गुणब्वयमिणं अइयारे तस्सिमे पंच ॥७५०।। उड्ढाहतिरिदिशाणं गहियपमाणं न चेव लंघेज्जा । खित्तस्स वुढिकरणं कुज्जा सति अंतरद्धं च ॥७५१।। पडिवन्ने होइ गुणो णियमा तक्खेत्तवत्तिजीवाणं । अभयपयाणा३ इहरा मणवइकाएहि सो वहगो ॥७५२।। उवभोगपरीभोगाण णियमणं बीयगणव्वयमिमं च । अणियत्ताण य दोसा विरयाण ण होति गुणभावा ।।७५३।। भोयणओ कम्मयओ दुविहं एवं समासओ णेयं । दोण्ह वि जहा कमेणं अइयारा हंतिमे वीसं ॥७५४।। सच्चित्तं पडिबद्धं अप्पउलिदुप्पओलियं च आहारं । तुच्छोसहिभक्खणयं पढमस्स इमे य अइयारा ।।७५५।। इंगाली-वणसाडी-भाडी-फोडी-सुवज्जए कम्मं । वाणिज्जं चेव य दंत-लक्ख-रह-केस-विसविसयं ।।७५६।।
१. थूलगदत्ता पा० । २. पंचप्पयारं पा० । ३. पयाणं पा० ।
Jain Education International
For Private & Personal Use Only
www.jainelibrary.org
| SR No. | 001593 |
| Book Title | Jugaijinandachariyam |
| Original Sutra Author | Vardhmansuri |
| Author | Rupendrakumar Pagariya, Dalsukh Malvania, Nagin J Shah |
| Publisher | L D Indology Ahmedabad |
| Publication Year | 1987 |
| Total Pages | 322 |
| Language | Sanskrit |
| Classification | Book_Devnagari, Literature, & Story |
| File Size | 8 MB |