Page Text
________________
[७ सुमतिसामिचरियं]
उप्पज्जन्ति पयाणं पुण्णेहिं जणम्मि ते महासत्ता। जे णियजसेण भुवणं भरन्ति णिववियजियलोया ॥१॥
अत्थि इहेव जंबुद्दीवे दीवे पुक्खलावई विजए संखउरं णाम णयरं णिचरमणिजं पमुइयजणावकिण्णं । तस्थ य राया विजयसेणाहिहाणो । तस्स सुदंसणा णाम सयलन्तेउरपहाणा अग्गमहिसी। तस्स य तीऎ सह विसयसुहमणुहवन्तस्स दोगुंदुयदेवस्स विय गच्छंति दियहा, सरइ संसारो। ____ अण्णया य कोलाणिमित्तं अप्पऽप्पणो विहवेणं उज्जाणम्मिणिग्गओ णयरलोओ। तीए य सुदंसणाए करेणुयारूढाए दिट्ठा तण्णयरनिवासिणो णंदिसेणस्स भजा सुलक्षणाहिहाणा अहिं वहूहिं परियरिया। पुच्छिया य तीए-का एस ? त्ति, कस्स वा भजा?, काओ वा एआओ कम्यगाओ जेहिं परियरिया ?। तओ परियाणिऊण कंचुइणा जहिट्ठियं साहियं जहा-सामिणि ! एसा गंदिसेणवणियस्स भज्जा सुलक्षणाहिहाणा, तीए दुवे पुत्ता, तेहि य चत्तारि चत्तारि एकेकेण य विवाहियाओ, तओ एयाहिं परियरिया जहाणुरूवं विसयसुहमणुहबइ। तओ सुदंसणाए तमवलोइऊण अणवञ्चत्तणेण य अत्तणो महन्तवेरग्गमुप्पणं । चिंतियं च णाए
किं ताण जए मणुयत्तणेण ?, किं जीविएण विहवेग ? । जाण ण जायइ तगओ गुणनिलओ सइ सुहावासो ॥२॥ जम्मो निरत्थओ तीए जीए महिलाए मम्मणुल्लायो । रमिऊग धूलिधवलो पुत्तो णारुहइ अंकम्मि ॥३॥ अण्णोण्णकजवइयरकज्जभरारुहणेचंपियं हिययं । ऊससइ णवर मणुयाण तणयमुहयंदसञ्चवणे ॥४॥ दोगचं पि ण णज्जइ, ण गणिज्जइ आवई वि गरुययरी । हिययस्स णिचुइकरो जाग सुओ गुणगणाहारो ॥५॥ इय एवमाइबहुआई तणयगयाइं ति सा विचिंतेती । संपत्ता णियभवणं परम्मुहा सयलकज्जेसु ॥६॥
समागंतूण य भवणं पेसियाओ सहीओ, पडिया य णीसहा सयणिजे । ग कुणइ सरीरपडिकम्म, णाऽऽलिहइ चित्तयम्म, ण कुणइ सुय-सारियाण पडिजागरणं । तओ एयावत्थं जाणिऊण समागओ राया। भणिया य-सुंदरि ! किमेवं ठिया सि ?, मइ भिचयणे किं समीहियं तुह ण संपजइ जेणे चिंतापिसाइयाए अप्पा आयासिज्जइ ?, केण खंडिया तुह आणा?, केण वा विरूवं पलोइया सि ?, साह सुंदरि ! कस्स सुमरियं कयंतेणं ? । तओ एयमायण्णिऊण भणियं सुदंसणाए-अजउत्त! तुमम्मि साहीणे को मह आणं खंडइ ? त्ति, किंतु णिबिण्णा अहमप्पणो जम्मेणमकयत्येणं ति । तओ राइणा सदुक्खं वयणमायण्णिऊण चिंतियं-किं पुण अचन्तणिन्वेयकारणं देवीए भविस्सति ? ति पुणो पुच्छामि । सुंदरि ! किमेवं गुरुचिंताए अम्हारिसो परियणो आउलीकीरइ ?, साहेसु किं ते उज्वेवकारणं ? ति । तओ साहिओ उज्जाणगमणवइयरो महारायस्स । साहिऊण य भणियं-जइ महं सन्तेसु विजा-मंतोसहिवेजेसु तुमम्मि अणुकूले ण होइ पुत्तुप्पत्ती ता णिस्संसयं चएमि निरत्ययं सरीरयं ति।
संसारसारभूओ पुत्तो च्चिय होइ सयलजियलोए । जस्स ण जायइ एको वि तस्स मणुयत्तणं विहलं ॥ ७ ॥
तओ तमायण्णिऊण भणियं राइणा-सुंदरि ! किमेवमाउलीभूया?, वीसत्था होहि, साहारेसु अप्पयं, कुणसु पाण'वित्तिं, अहं पुण देवयाराहणाइणा तहा तहा करिस्सामि जहा देवीए पुजन्ति मणोरह त्ति । भणिऊण संठविया महादेवी।
अण्णया य छटोववासेण ठिओ । आराहिया य कुलदेवया समागया चरिमजामम्मि सुहपसुत्तस्स । भणिओ य देवयाए जहा-महाराय ! किमेवमुचिग्गो सि ?, भविस्सईं सब्बलक्खणधरो दियलोयचुओ तुज्झ पुत्तो। त्ति भणिऊण गया देवया।
१°ए खंडउरं सू । २ °ए विसय सू । ३ एयाओ जे। ४ ओ अइसुहा जे। ५ णचप्पियं स । ६ वित्ती जे ७ छट्ठोवासेण जे सू । ८ ते सव्व जे सू ।
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |