Page Text
________________
१ रिसहसामि-२ भरहचक्कवट्टिचरियं । णिग्गओ य चउरंगबलसमेओ रायहाणीए, पत्तो णिययदेसपजतं । आवासिओ संगामजोग्गपएसासण्णभूमिभागे । सिक्खविऊण पेसिओ भरहाहिवस्स दूओ । तेण य लद्धावसरेण य विष्णत्तो भरहाहिवो जहा-"महाराय !
जेण पंवत्तो सि तुम पहेण सप्पुरिसणिदिओ एस । किच्चावसाणदुहओ, विजयत्थी किं बुहो कुणइ ? ॥ १८२॥ विहवो ता दूरे च्चिय सुपुरिस ! जीयं पि ते णसामण्णं । णरणाह ! इमम्मि तुहं णवरमसाहारणो अयसो ॥१८३॥ किंच ण याणसि एवं पीई जह सजणस्स एक्करया । ढुक्खं विसंघडिज्जइ दुक्खं चिय 'विहडिया घडइ ॥१८४॥ कन्जमवसाणविरसं होही णरणाह ! साहियं तुज्झ । कुसलं गयाहिवइणो सीहविरोहम्मि कि होइ ? ॥१८५॥ जो णिज्जिऊण भरहं कह कहवि समज्जिओ जयपयावो । बाहुबलिगो भडेहिं मा घेप्पउ सो जसो एहिं ॥१८६॥ पिउणा 'दिन्नेणं चिय होइँ कयत्थो बली य बंधू य । किं तुज्झ एत्थ णटुं ?, भरहाहिव ! होसु जसभागी ॥१८७॥ बाहुबलिम्मि गराहिव ! अणुणिज्जतम्मि णिज्जियं भरहं । इहरा बंधुच्छायणमयस चिय केवलं पडियं" ॥१८८॥
इय भणिऊण सविणयं दूओ पुण भणइ सामिसंदिढे । हीणुत्तिमाण मज्झे केणिह जुज्झेण जुज्झामो ? ॥ १८९॥ तओ तब्बयणावसाणे भणियं भरहाहिवेणं
“अप्पाणमप्पण च्चिय लहुया सलहन्ति जं तयं जुत्तं । इहरा गुणाणुवेक्खो को अण्णो ते पसंसेउ ? ॥ १९०॥ सुपुरिसमग्गुत्तिष्णं तुह राया णवर भासिउं मुणइ । पडिवयणमण हिआ जं अम्हे ण य झाविया गुरुणा ॥ १९१॥
रे दूय ! वयणमेत्तसारेण किं बहुणा पलविएणं ?, सूर-कायराणं विसेसो फलेणं चेवे णिव्वडइ ति"। पुणो भणियंउत्तिमजुज्झेण जुज्झामो। दूएण भणियं-"जइ एवं ता किमणेण जणक्खएणमफलेणं करणं? । ण तुह बलं मह पुरिसेहि तीरइ ओवग्गिउं, ण य तुह भडेहि मज्झ बैंलं ति । ता तुम पि तायस्स पुत्तो, अहं पि। णिचडउ दोण्ह वि परकमो। पेच्छंतु दो वि वलाई सक्खीभूयाइं । जुज्झं पुण तिविहं
दिट्ठीए उत्तम, मज्झिमं तु बाहाहिं तह य वायाए । णिसियासि-तोमराईहि होइ अहमं जणविणासि" ॥१९२॥
तओ तव्वयणाणंतरं भणियं महारायाहिराएणं-दिट्ठीजुज्झातिणा उत्तिमजुज्झेण जुज्झामो । त्ति भणिऊण विसज्जिओ दूओ । साहियं णीसेसं बाहुबलिणो।।
अह जयदुप्परियल्लं अग्गक्खंधम्मि दारुणं समरं । सेणावइपमुहाणं भडाण जायं धरेऊण ॥ १९३॥ भरहाहिव-बाहुबलिणो उत्तिमजुज्झेण जुज्झिउं पयट्टा । तत्थ यपढमं दिट्ठीजुझं, वायाजुझं, तहेव बाहाहिं । मुट्ठीहि य डंडेहिं य सव्वत्थ वि जिप्पई भरहो ॥ १९४ ॥
एत्यंतरम्मि गुरुपरिहवाबूरियहियएण चकवट्टित्तणम्मि जणियवियप्पेणं भरहाहिवेण सुमरियं चक्करयणं । सुमरियाणंतरमेव हत्थम्मि ठियं । तओ उभयबलेसु समुट्ठिओ हाहारवसद्दगब्भिणो महंतो कलयलो। मुकं च जालामालाउलीकयणहयलं चक्करयणं । णियगोत्ते ण पहरइ । परिअंचिऊण बाहुबलिं पुणरवि तस्स चे हत्थम्मि ठियं । दिदं च हत्थट्टियं चक्करयणं याहुबलिणा । तओ कोवाणलुब्भिज्जन्तणयणराओ भणिउमाढत्तो बाहुबली
"किं चुण्णेमि सचकं णिटुरभुयजन्तदढपरिग्गहियं । सबलं तुम णराहिव ! पयडेउ बलं तु बाहुबली ॥१९५॥ णयमज्जायाचलियम्मि संपयं को गुणो व्व तइ णिहए ?। दाइज्झिताऽहिगहणेण मंतिणो कि पि सामत्थं? ॥१९६॥ धिद्धी अहो ! अकजं जं खेलविसयाण कारणे एस । मुंचइ उइयपरिहवो आयारं पोरुसं सच्चं ॥ १९७॥ ता छड्डेमि सँई चिय हयविसए जाण कारणे लोओ। णियबंधुम्मि वि पहरइ निरवेक्खो मुक्कमज्जाओ ॥१९८॥ विस-विसयाणं दोण्ह वि भणंति अञ्चंतमंतरं विउसा। सइ भुत्तं हणइ विसं विसया सरिया वि बहुसो वि ॥१९९॥ ण गणेइ णिरयवियणाओ णेय लज्ज ण गोरवं ण कुलं । विसयविसमोहियमई कज्जा-कज्जं ण लक्खेइ ॥ २००॥
१ पयत्तो जे। २ जीवं पि सयलसाम सू । ३ दुक्खं पि संपडिजे। ४ वियडिया सू । ५ पयासो। सू। ६ दिण्हेण सू। ७ कोइ जे। ८ बंधूण। जे। ९ चेय जे। १० बलन्ति स । ११ तुमम्पि स । १२ अहम्पि सू । १३ चेय जे। १४ खल विजे। १५ सय जे।
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |