Page Text
________________
३७
१ रिसहसामि- २ भरहचक्कवट्टिचरि। धष्णा सि तुमं देविंदवंदिए ! जयसलाहणिज्जा सि । गन्मम्मि जीए तेलोकधम्मधुरधारओ धरिओ ॥१२१ ।। इय सयलजीववच्छल ! जयगुरु ! संसारसायरुद्धरणे । तइ णाहेण सणाहं भरहं अम्हे वि दूरत्था ॥ १२२ ॥ एवमभिणंदिऊण तित्थयरसहियं जणणि, वरिसिऊण रयणवरिसं, गया सहाणेसु तियसा।
विउद्धा य मरुदेवा सामिणी, पेच्छई य दिव्वालंकारभूसियं बालयं, पयइत्थं च बालियं। पेच्छन्ती य तं मिहुणगं पुण्णेयरविभागम्यगं जणणी अञ्चन्तविम्हयमुवगया, साहियं च जहाविहमेव दइयस्स । तेगावि भणियं-पुब्वमेव मए तुह साहियं जहा-तेलोकवंदणिजो भविस्सइ ते पुत्तो, पुण्णेयराणं च विभागो मिहुणगेणेव सिट्ठो, जो एक चिय कुच्छी, तिहिणक्खत्ताइयं एकमेव, तहावि देवाण वि विम्हयजणणो विसेसो । पइटावियं च णामं पढमवसहसुइणदंसणेण ऊरुवसहलंछणेण य उसहसामी । सो य तियसंगुट्ठणिहित्तसुहरसासायणेणं बुभुक्खोवसमं करेइ, ण पाययपुरिसो व्व पओहरपएणं। ___ एवं च वड्ढन्तस्स भगवओ णाहिकुलयरुच्छंगगयस्स 'कप्पो' त्ति काऊण गहियईक्खुलट्ठी वंसठवणत्थं समागओ सुरिंदो। भगवया वि ओहिणा मुणिऊण पसारिओ इक्खुलटिगहणत्थं हत्थो। तओ मुरिंदेण समप्पिऊण इक्खुलर्हि वंदिऊण भयवन्तं इक्खुवंसो त्ति कया वंसठवणा।। ___ एवं च सरन्ते संसारे वइते भयवंते अणोवमसरीरे अण्णया एगं मिहुणगं तालरुक्खअहे कीलिउं पयत्तं। ताव य भवियव्ययाणिओएणं परिणयतालफलेणं णिवडिऊण पहओ मम्मपएसे मिहुणगपुरिसो, अकालमच्चुपहावेण य मओ। तम्मि मए सा मुद्धहरिणि व अमुणियकरणिज्जा अवियाणियमरणसहावा किंकायचविमुहिया ठिया, अवराणि य मिहुणगाणि परिवारिऊण ठियाणि । पुचि च मयमिहुणकलेवराणि महाविहंगमेहिं तक्खणमेव समुदमज्झयारे पक्खिपन्ति, संपयं तस्साणुहावस्स वियलणेण अपुव्वकालमच्चुमरणदंसणेण य कोह-भय-विम्हयऽक्खित्तसरीरा अमुणियसब्भावा तं उवहसियरूवतियसंगणारिद्धिं जणमण-णयणुच्छवभूयं मिहुणगा घेत्तूण णाहिकुलगरमुवट्ठिया। तेणावि 'उसहसामिणो पणइणी भविस्सइ ' त्ति संगहिया।
अण्णया य समुल्लसंते जोयणे, विभज्जमाणेसु सरीरावयवेसु भोगसमत्थं गाउं भयवन्तं बहुदेवैयणपरियरिओ अच्छरसमूहसंजुओ पालंतो पुवट्टिई विवाहणिमित्तं समागओ सुराहिवई सपरिवारो । सयमेव विवाहकम्मं [? करेइ भयवओ, कारवेइ य] सञ्चपमुहेण य अच्छरायणेण देवीए सुमंगलाए सुणंदाए य । तओ महया विमद्देणं अच्छरगिरुग्गीयमंगलरवेण पहयणाणाविहाउज्जसद्दुच्छलियपडिरवपहरियणहंगणाहोएणं महयारम्भेणं भयवओ सुमंगलाए सुणंदाए सह कारियं पाणिग्गहणं । गओ सट्ठाणं सुराहिबई । मुंजइ य भोए भयवं । अणवरयं हीयमाणेसु सुहाणुभावेसु, पवड्डते कसायपसरे, गच्छंतेसु सढत्तणं पुरिसेसु, विलंपिज्जंतीम तीसु वि डंडनीईसु मिहुणगा उसभसामिमुवटिया । भणियं च तेहिं जहा-देव ! असमंजसीहूया मिहुणायारा, लंघिजन्ति पुंवट्ठीओ, ण गणिज्जति हक्काराइयाओ डंडणीईओ, तओ जमेत्थ पत्तयालं तं देवो सयमेव वियारिऊण उवइसउ । भयवया भणियं-राया डंडधरो मज्जायाइक्कमणिरोहयारओ होइ त्ति, सो य कयाभिसेओ मंतिसमेओ चउरंगबलसमण्णिओ अप्पडिहयसासणो होइ, णऽण्णहा। तेहिं भणियं-तो भयचं! तुम चेव अम्हमणाहाणं णाहत्तणं कुणसु त्ति। भगवया भणियं-कुलगरो तुम्हाणं देहि त्ति । तओ कुलगरसुवट्ठिया। तेणावि रूब-विण्णाणाइसयऽहियएणं 'तुम्हाणमुसहो सामिओ' त्ति भणियं, गच्छह य तस्साविलंबियं रज्जाहिसेयं कुणह । गया य ते उदयणिमित्तं । एत्थंतरे य सुरिंदेणं 'कप्पो' त्ति काऊण महया विभूईए को भगवओ रज्जाभिसेओ, महारायजोग्गो [य] मउडाइअलंकारो। गओ य सट्ठाणं सुराहिवई। समागया य कमलिणीदलपुडगहियसलिला मिहुणगा। पेच्छन्ति य विम्हयऽक्खित्तहियया हरिसभरिजन्तलोयणा कयरज्जाहिसेयं देवदुगुल्लच्छाइयदेहं बहलगोसीसचंदणुद्दामविलित्तसरीरं विविहमउडपट्टबंधाइअलंकारालंकियं भगवन्तं । तो 'अम्हाण एस सामिओ' ति भणिऊण 'ण एयस्स उत्तिमंगजोग्गं सलिल'मिइ चिंतिऊण य पल्हत्थियं भगवओ चलणकमले कमलरयपिंजरियं मज्जणसलिलं ।
१ई रयणविहूसिय बालय, जे । २'इक्ल(क्खू) वस सू । ३ तम्मि समए सा सू। ४ °देवगण जे । ५ पुव्वत्थीओ जे।६ डडणीओ जे।
Jain Education International
For Private & Personal Use Only
www.jainelibrary.org
| SR No. | 001442 |
| Book Title | Chaupannamahapurischariyam |
| Original Sutra Author | Shilankacharya |
| Author | Amrutlal Bhojak, Dalsukh Malvania, Vasudev S Agarwal |
| Publisher | Prakrit Text Society Ahmedabad |
| Publication Year | 2006 |
| Total Pages | 464 |
| Language | Prakrit, English, Hindi |
| Classification | Book_Devnagari, Literature, & Story |
| File Size | 14 MB |