Tu Rangai Jane Rangma 08

Author(s): Purnanand Prakashan
Publisher: Purnanand Prakashan

Page 5

ધર્મને મહત્ત્વ આપજે
એક યુવાન, તેને ધર્મના સંસ્કાર ખૂબ જ સારા. માતા-પિતાએ ધર્મના સંસ્કાર સારા આપેલા. ધર્મના સંસ્કાર જ તેનું કલ્યાણ કરશે તેવી માતા-પિતાને શ્રદ્ધા હતી. તે યુવાનની બુદ્ધિ-પ્રતિભા પણ ઘણી સારી હતી. કંઈક ને કંઈક કરવાની ધગશ છે. આર્થિક પરિસ્થિતિ સામાન્ય છે. ખૂબ જ સાદાઈથી આગળ વધે છે. પણ, ભણવામાં ખૂબ જ તેજસ્વી. મહેનત કરી ભણે છે, અને આગળ જતાં મિકેનિકલ એન્જિનિયર થયો. સાધુ ભગવંતનો સંપર્ક તો નાનપણથી જ હતો. એકવાર ગુરુદેવનો વિશેષ સંપર્ક થયો. ધીમે ધીમે ધંધો સારો ચાલવા લાગ્યો. સાથે સાથે નામના પણ જામી... તેને લાગ્યું કે આ ધર્મનો પ્રભાવ છે અને ગુરુભગવંતના સંપર્કમાં રહી અવારનવાર ધર્મ-ચર્ચા કરતો. ધર્મનાં તત્ત્વોને વિચારતો તે દરમ્યાન એક દિવસ ગુરુભગવંતે કહ્યું કે ભાગ્યશાળી ! એક વાત ધ્યાનમાં રાખજે કે... ધર્મને આગળ રાખીને ધંધો કરજે. પાપ અને અનીતિથી દૂર રહેજે. દુર્ગતિમાં જઈશ તો... તને છોડાવવા કોઈ નહીં આવે. યુવાન ભક્તને તાર્કિક દષ્ટિએ પણ વાત બરાબર બેસી ગઈ. આથી, ધર્મને કોઈપણ જાતનો બાધ ન આવે તે રીતે ધંધો કરવા લાગ્યો. ભાગ્યયોગે ધંધો પણ ધમધોકાર ચાલવા લાગ્યો. બિલકુલ ફુરસદ ન મળે. જે કામો હાથમાં લે તે બહુ જ સારી રીતે પૂર્ણ કરે. ધંધામાં વળતર પણ સારું મળવા લાગ્યું. જેથી નામ અને દામ બંને કમાયો.
એકવાર જબરજસ્ત મોટી કંપની તરફથી ઓફર આવી. જે કામ બહુ જ મોટું હતું. તેણે ગણતરી કરી કે આ કામમાં શું મળશે ? તો તેના હિસાબે ચાલીસથી પચાસ લાખ મળવાની પૂરી શક્યતા હતી. આ યુવક એન્જિનિયર હતો. તેને તો આ બધાં કામો માટે મશીનની ડિઝાઇનો બનાવવાની હતી. ઓછી જગ્યા અને ઓછા સમયમાં વધુ કામ થાય તે રીતે સ્પરસ્પાર્ટ્સ ગોઠવી મશીન બનાવવામાં તેની માસ્ટરી હતી.
જો આ ઑફર પ્રમાણે ડિઝાઇન બનાવી આપે અને તેની ડિઝાઇન પાસ થાય તો સેંકડો નહીં બલકે લાખો જીવોની કત્લેઆમના ભાગીદાર બનવું પડે.
તેને તો ફક્ત ડિઝાઇન બનાવી આપવાની હતી. તેને હિંસા કરવાની ન હતી. અને આટલું કરે તો રૂપિયા જ રૂપિયા હતા. લક્ષ્મીનો ઢગલો થવાનો હતો પણ હૈયામાં વહેતો જીવો પ્રત્યેનો દયા-કરૂણાનો ભાવ, હૈયામાં વહેતી ગુરુવાણીનો રણકાર આ યુવાનને સ્પર્શી ગયેલો. એણે કંપનીવાળાને કહી દીધું કે આ કાર્ય મારાથી નહીં થઈ શકે. કંપનીવાળાએ બીજા દિવસે આ યુવાનનો ટાઇમ લઈને મીટિંગ ગોઠવી અને કહ્યું કે વળતર ઓછું મળતું હોય તો બોલો, પરંતુ ના કેમ પાડો છો ? તો યુવાને કહ્યું કે વળતરનો સવાલ નથી. આ કામ કરવાની મારો ધર્મ ના પાડે છે. ધર્મ કચડીને ધન શું કરવાનું ? ધન્ય છે આવા જિનશાસનના છૂપા રત્નોને જેઓએ શાસનનું ગૌરવ વધાર્યું છે.
બાળકો ઃ ૧. જીવનમાં ધર્મને મહત્ત્વ આપજો. ધર્મ જોઈએ કે ધન ? તે નક્કી કરશો.
૨. ધર્મ પ્રત્યેની અતૂટ શ્રદ્ધા તમને સફળતાના માર્ગે લઈ જાય છે.
૩. દેવ, ગુરુ અને ધર્મ પ્રત્યેની ખુમારીવાળા જીવો હશે ત્યાં સુધી શાસનનો જય જયકાર થશે.