________________
દિલમાં અપ્રીતિભાવ ઉત્પન્ન થયો. મુનિ ઝવેરસાગરજીએ પણ કાંઈક ખટપટ કરી. જેથી કેટલાએક મુનિઓ મહારાજજીથી વિમુખ થઈ જુદા પડ્યા. આ કારણથી મહારાજશ્રીના દિલમાં બહુ ખેદ થયો અને મન ઉદાસ રહેવા લાગ્યું. એ સમાચાર સાંભળીને શ્રીઅમદાવાદથી ત્યાંના આગેવાન શ્રાવકો મહારાજજીને તેડી જવા ભાવનગર આવ્યા. મહારાજજી ચાલી શકે એમ ન હોવાથી સાથે મ્યાનો લેતા આવ્યા. મહારાજજીને અનેક પ્રકારે વિનંતિ કરી, પરંતુ મહારાજજીનું દિલ કોઈ રીતે માનામાં બેસીને અમદાવાદ જવાનું થયું નહીં. છેવટે આઠ દિવસ રોકાઈને આવેલા શ્રાવકો પાછા અમદાવાદ ગયા.
સંવત ૧૯૪૬માં મહારાજજીના ઉપદેશથી ઘણાં શુભ કાર્યો થયાં, જેમાં ભાવનગરના સંઘે દ્રવ્યનો વ્યય પણ પુષ્કળ કર્યો.
૧. કાર્તિક માસમાં પાવાપુરીની રચનાનો ઉત્સવ થયો.
૨. માગશર માસમાં અને વૈશાખ માસમાં ત્રણ દીક્ષા મહોત્સવ થયા જેમાં ત્રણ શ્રાવકોએ દીક્ષા ગ્રહણ કરી.
૩. શ્રાવણ વદિ એકમે શ્રી ગોડી પાર્શ્વનાથજીના દેરાની પાછળ બંધાયેલા નવા દેરાસરજીમાં પ્રતિષ્ઠા કરવામાં આવી. મૂળનાયકજી તરીકે શ્રીશ્રેયાંસનાથજીને બિરાજમાન કર્યા. આ પ્રસંગે મહોત્સવ બહુ શ્રેષ્ઠ થયો અને દેરાસરજીમાં ઉપજ પણ સારી થઈ.
