Agam 06 Ang 06 Gnatadharma Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 198

ज्ञाताधर्मकथा
१४
तए णं से विजए तक्करे चोरसेणावई रायगिहस्स णगरस्स दाहिणपुरिच्छमं जणवयं बहूहिं गामघाएहि य णगरघाएहिं य गोगहणेहि य वंदिग्गहणेहि य पंथकुट्टणेहिं य खत्तखणणेहि य उवीलेमाणे उवीलेमाणे विद्धंसेमाणे-विद्धंसेमाणे णित्थाणं णिद्धणं करेमाणे विहरइ । तए णं से चिलाए दासचेडे रायगिहे णयरे बहूहि अत्थाभिसंकीहि य चोराभिसंकीहि य दाराभिसंकीहि य धणिएहि य जयकरेहि य परब्भवमाणे -परब्भवमाणे रायगिहाओ णयराओ णिग्गच्छइ, णिग्गच्छित्ता जेणेव सीहगुहा चोरपल्ली तेणेव उवागच्छइ, उवागच्छित्ता विजयं चोरसेणावई उपसंपज्जित्ता णं विहरइ । तए णं ते चिलाए दासचेडे विजयस्स चोरसेणावइस्स अग्गे असि-लट्ठिग्गाहे जाए यावि होत्था । जाहे वि य णं से विजए चोरसेणावई गामघायं वा जाव पंथकोट्टि वा काउं वच्चइ ताहे वि य णं से चिलाए दासचेडे सुबहंपि हु कूवियबलं हय-महियं जाव पडिसेहेइ, पडिसेहित्ता पुणरवि लखढे कयकज्जे अणहसमग्गे सीहगुहं चोरपल्लिं हव्वमागच्छइ । तए णं से विजए चोरसेणावई चिलायं तक्करं बहुओ चोरविज्जाओ य चोरमंते य चोरमायाओ य चोरणिगडीओ य सिक्खावेइ । तए णं से विजए चोरसेणावई अण्णया कयाई कालधम्मणा संजुत्ते यावि होत्था । तए णं ताई पंच चोरसयाई विजयस्स चोरसेणावइस्स महया महया इड्ढी-सक्कार-समुदएणं णीहरणं करेंति, करित्ता बहूई लोइयाइं मयकिच्चाई करेंति, करित्ता जाव विगयसोया जाया यावि होत्था । तए णं ताइं पंच चोरसयाई अण्णमण्णं सद्दावेंति, सद्दावित्ता एवं वयासी- एवं खलु अम्हं देवाणुप्पिया ! विजए चोरसेणावई कालधम्मुणा संजुत्ते । अयं च णं चिलाए तक्करे विजएणं चोरसेणावइणा बहूईओ चोरविज्जाओ य जाव सिक्खाविए । तं सेयं खलु अम्हं देवाणुप्पिया ! चिलायं तक्करं सीहगुहाए चोरपल्लीए चोरसेणावइत्ताए अभिसिंचित्तए त्ति कट्ट अण्णमण्णस्स एयमहूँ पडिसुणेति, पडिसुणित्ता चिलायं तक्करं तीए सीहगुहाए चोरसेणावइत्ताए अभिसिंचंति । तए णं से चिलाए चोरसेणावई जाए अहम्मिए जाव विहरइ। तए णं से चिलाए चोरसेणावई चोरणायगे जाव कुडंगे यावि होत्था । से णं तत्थ सीहगुहाए चोरपल्लीए पंचण्हं चोरसयाण य एवं जहा विजओ तहेव सव्वं जाव रायगिहस्स नयरस्स दाहिण पुरच्छिमिल्ल जणवयं जाव णित्थाणं णिद्धणं करेमाणे विहरइ । तए णं से चिलाए चोरसेणावई अण्णया कयाई विउलं असणं-पाणं- खाइमं -साइमं उवक्खडावेत्ता ते पंच चोरसए आमंतेइ तओ पच्छा बहाए जाव भोयणमंडवंसि तेहिं पंचहिं चोरसएहिं सद्धिं विउलं असणं-पाणंजाव आसाएमाणे विसाएमाणे परिभाएमाणे परिभुजेमाणे
192