Agam 02 Ang 02 Sutrakrutang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 96

सुयगडांग सूत्र - बीओ सुयखंधो णिग्गंथधम्मम्मि इमं समाहिं, अस्सिं सुठिच्चा अणिहे चरेज्जा। बुद्धे मुणी सीलगुणोववेए इच्चत्थयं पाउणइ सिलोगं || सिणायगाणं तु दुवे सहस्से, जे भोयए णितिए माहणाणं ।
ते पुण्णखधं सुमहज्जणित्ता, भवंति देवा इइ वेयवाओ || ४४ | सिणायगाणं तु दुवे सहस्से, जे भोयए णितिए कुलालयाणं ।
से गच्छड़ लोलुवसंपगाढे, तिव्वाभितावी णरगाभिसेवी | ४५, दयावरं धम्म दुगुंछमाणो, वहावहं धम्मं पसंसमाणो ।
एगं पि जे भोययइ असीलं, णिहो णिसं जाइ कओ सुरेहिं ॥ दुहओ वि धम्मम्मि समुट्ठियामो, अस्सिं सुठिच्चा तह एसकाले । आयारसीले बुइएह णाणे, ण संपरायम्मि विसेसमत्थि || अव्वत्तरूवं परिसं महंतं, सणातणं अक्खयमव्वयं च । सव्वेसु भूएसु वि सव्वओ से, चंदोव्व ताराहिं समत्तरूवे || एवं ण मिज्जंति ण संसरंति, ण माहणा खत्तिय वेस पेसा । कीडा य पक्खी य सरीसिवा य, णरा य सव्वे तह देवलोगा | लोयं अयाणित्तिह केवलेणं, कहिंति जे धम्ममजाणमाणा । णासेंति अप्पाण परं च णट्ठा, संसार घोरम्मि अणोरपारे || लोयं विजाणंतिह केवलेणं, पण्णेण णाणेण समाहिजुत्ता । धम्म समत्तं च कहिंति जे उ, तारेंति अप्पाण परं च तिण्णा || जे गरहियं ठाणमिहावसंति, जे यावि लोए चरणोववेया । उदाहडं तं तु समं मईए, अहाउसो ! विप्परियासमेव ॥ संवच्छरेणावि य एगमेगं, बाणेण मारेउ महागयं त् । सेसाण जीवाण दयट्ठयाए, वासं वयं वित्तिं पकप्पयामो || संवच्छरेणावि य एगमेगं, पाणं हणंता अणियत्तदोसा । सेसाण जीवाण वहेण लग्गा, सिया य थोवं गिहिणो वि तम्हा || संवच्छरेणावि य एगमेगं, पाणं हणंते समणव्वएसु । आयाहिए से पुरिसे अणज्जे, ण तारिसा केवलिणो भवंति || बुद्धस्स आणाए इमं समाहिं, अस्सिं सुठिच्चा तिविहेण ताई । तरिउं समुदं व महाभवोघं आयाणवं धम्ममुदाहरेज्जासि ॥त्ति बेमि॥
॥ छ8 अज्झयणं समत्तं ॥