________________
संवेगरंगसाला
SST.ORGE
पाटलिपुत्रे विद्यापठनं प्रेक्षणकदर्शने
अलीकविकल्पोत्पत्ति
॥१५७||
तुट्ठो विजाए निवो, दिना पिउसंतिया य से भुत्ती । जाओ य सम्मओ राय-पउरलोयस्स सव्वस्स ॥१९९०॥ नरवइसम्माणेणं, इस्सरिएणं च सुयमएणावि । तिणमिव जयं नियन्तो, कालं वोलेइ सो तत्थ ॥१९९१॥ इस्सरियाऽऽइलवेण वि, तरलिजइ माणसं अधीराणं । किं पुण कुलबलविजाऽऽइ-याण सव्वेसि समवाए ॥१९९२॥ अवि तीरिजइ जुगविगम-जलहिकल्लोलपडलमावि खलिउ । इस्सरियाऽऽइमहामय-विवसं तु मणो न थेवं पि ॥१९९३।। इय सो उम्मत्तमणो, एगम्मि दिणे. नडाण पेच्छणयं । कोऊहलेणं दटुं, निसिम्मि मित्तेहिं संलत्तो ॥१९९४॥ हे मित्त ! एहि जामो, नडपेच्छणयं खणं पलोएमो । दिट्ठी दट्ठव्वपलोय-णेण सहलत्तणमुवेइ ॥१९९५॥ तेसि अणुवित्तीए, गओ तहिं सो ठिओ य खणमेक्कं । अह तत्थ तया जुबई, विडेण सह जंपिरी एवं ॥१९९६॥ अलियविउसेण पइणा, निरुद्धपसराए संपयं मज्झ । तुह सुहय ! दंसणामध्य-लाभेणं निव्वुई जाया ॥१९९७॥ हे पेच्छणगपयट्टग !, चिरकालं जीवियं हवउ तुज्झ । जेण कओ वक्खेवो, मह पइणो कोवजलनिहिणो ॥१९९८॥ ता एहि सुहय ! जावेस, कूडविउसो इहेव जावेइ । ताव खणं कीलित्ता, नियनियगेहेसु वच्चामो. ॥१९९९।। इय तीए पणयसारं, गिरमायनिय विचिन्तियं तेण । अलियवियप्पविगप्पण-पवणपणोल्लियमणेण इमं ॥२०००॥ नूणं सा मे भञ्जा, एसा परपुरिसमणुसरइ पावा । कूडविउसं च मन्ने, ममं च उदिस्स वागरइ ॥२००१॥ पुव्वं पि दुट्ठसीला, लिङ्गेहि मए वियाणिया आसि । संपइ पच्चक्खं चिय, दिट्ठा ता निग्गहामि इमं ॥२००२॥ इय चिन्तेन्तो जा ताड-गट्ठया पट्ठिओ इमो तीए । ता सच्छंदपयारा, सा जुवई कत्थइ गय त्ति ॥२००३॥
॥१५७॥
