Page Text
________________
॥३०७॥
जति णं भंते! समणेणं जाव संपत्तेणं धम्मकहाणं दस वग्गा पंनत्ता, पढमस्स णं भंते ! वग्गस्स समणेणं जाव संपत्तेणं के अड्डे पन्नत्ते ?, एवं खलु जंबू ! समणेणं जाव संपत्तेणं पढमस्स वग्गस्स पंच अज्झयणा पन्नत्ता तंजहा-काली राई रयणी विज्जू मेहा, जइ णं भंते ! समणेणं जाव संपत्तेणं पढमस्स वग्गस्स पंच अज्झयणा पंनत्ता, पढमस्स णं भंते ! अज्झयणस्स समणेणं जाव संपत्तेणं के अट्ठे पंनत्ते ?, एवं खलु जंबू ! तेण कालेणं २ रायगिहे णयरे गुणसीलए चेइए सेणिए राया चेलणा देवी, सामी समोसरिए परिसा णिग्गया जाव परिज्जु
२ ।
तेणं कालेणं २ काली नामं देवी चमरचंचाए रायहाणी कालवडिंसगभवणे कालंसि सीहासणंसि चउहिं सामाणिय-साहस्सीहिं चउहिं महयरियाहिं सपरिवाराहिं तीहिं परिसाहिं सत्तहिं अणीएहिं सत्तहिं अणियाहिवतीहिं सोलसहिं आयरुक्ख देवसाहस्सीहिं अण्णेहिं बहुएहि य कालवर्डिसयभवणवासीहिं असुरकुमारेहिं देवीहिं देवेहि य सद्धि सपरिवुडा महयाहय जाव विहरइ, इमं च णं केवलकप्पं जंबुद्दीवं २ विउलेणं ओहिणा आभोएमाणी पास, तत्थ समणं भगवं महावीरं जंबुद्दीवे २ भारहे वासे रायगिहे नगरे गुणसिलए जेइए अहापडिरूवं उग्गहं उग्गिण्हित्ता संजमेणं तवसा अप्पाणं भावेमाणं पासति २ त्ता हट्ठतुट्ठचित्तमाणंदिया पीतिमणा जाव हयहियया सीहासणाओ अब्भुट्टेति २ पायपीढाओ पच्चोरुहति २ पाउयाओ ओमुयति २ तित्थगराभिमुही सत्तट्ठपयाई अणुगच्छति २ वामं जाणुं अंचेति २ दाहिणं जाणुं धरणियलंसि निहट्ट तिक्खुत्तो मुद्धाणं धरणियलंसि निवेसेति २ ईसि पच्चुण्णमइ २ कडयतुडियथंभियातो भुयातो साहरति २ करयल जाव कट्ट एवं वयासी- णमोऽत्थु णं अरहंताणं जाव संपत्ताणं, णमोऽत्यु णं समणस्स भगवओ महावीरस्स जाव संपाविउकामस्स, वंदामि णं भगवंतं तत्थगयं इह गए, पासउ मे समणे भगवं महावीरे तत्थ गए इह गयंति-कट्टु वंदति २ नम॑सति २ सीहासणवरंसि पुरत्याभिमुहा निसण्णा ३ ।
तते णं तीसे कालीए देवीए इमेयारूवे जाव समुप्पज्जित्था सेयं खलु मे समणं भगवं महावीरं वंदित्ता जाव पज्जुवासितएकट्ट एवं संपेहेति २ आभिओगिए देवे सद्दावेति २ एवं वयासी- एवं खलु देवाणुप्पिया ! समणे भगवं महावीरे एवं जहा सुरियाभो तहेव आणत्तियं देइ जाव दिव्वं सुरवराभिगमणजोग्गं करेह २ जाव पच्चप्पिणह, तेवि तहेव करेत्ता जाव पच्चप्पिणंति, नवरं जोयण-सहस्स विच्छिण्णं जाणं से तहेव, तहेव णामगोयं साहेइ तहेव नट्टविहिं उवदंसेइ जाव पडिगया भंतेत्ति भगवं गोयमे समणं भगवं महावीरं वंदति णमंसति २ एवं
॥३०७॥
| SR No. | 600272 |
| Book Title | Gnata Dharmkathangasutram |
| Original Sutra Author | Jinendrasuri |
| Author | |
| Publisher | Harshpushpamrut Jain Granthmala |
| Publication Year | |
| Total Pages | 320 |
| Language | Sanskrit |
| Classification | Manuscript & agam_gyatadharmkatha |
| File Size | 9 MB |